நூல் வெளி: தூரவெளி வானில் துவள்கின்ற துயில்

ஈழ இலக்கியப் படைப்புகள் வெளிவந்த வண்ணமுள்ளன. நவீனத் தமிழ் இலக்கியத்துள் ஈழப் புனைவுகளின் பங்களிப்பு முக்கியத்துவமுடையவை. அலைந்துழன்று துயரத்தின் பெருவெளியில் பதியமிடப்பட்ட தம் வாழ்வை எழுதுகிறார்கள். ஒவ்வொருவருக்கும் தனித்த அனுபவங்கள்; தரிசனங்கள். பெரும்பாலும் ஒடுக்குமுறை, போராட்டம், போர், புலம்பெயர்வு, தாயக நினைவுகளென நீளும் நிரையே இவர்களின் இலக்கியக் களம். இந்த வரிசையில் வெளியான ஈழ எழுத்தாளர் தெய்வீகனின் ‘உன் கடவுளிடம் போ’ தொகுப்பு பல அம்சங்களில் முக்கியமானது.

இந்தத் தொகுப்பிலுள்ள கதைகளின் அகவய நுட்பம் சிறப்புக்குரியது. புறவய விவரிப்புகள் வழியாக மிகையற்ற உணர்வுகளை அழகியல் நுண்மைகளோடு முன்வைக்கும் தெய்வீகனின் ‘புலரியில் மறைந்த மஞ்சள் கடல்’ கதை சிறந்த நவீனத் தமிழ்ச் சிறுகதைகளில் ஒன்றாக அடையாளப்படுத்தும் தகுதி படைத்தது.