வங்கக்கடலோரம் ஒரு வரலாற்றுச் சுவர்... ஆலம்பரை கோட்டை!

சென்னை கிழக்குக் கடற்சாலை என்றாலே மாமல்லபுரம்தான் எல்லாருக்கும் நினைவுக்கு வரும். மாமல்லபுரம் செல்லும் வழியில் முட்டுக்காடு, முதலைப் பண்ணை, புலிக்குகை ஆகிய பகுதிகளுக்கும் விசிட் அடிப்பவர்கள் உண்டு. இந்த இடங்களைத் தாண்டி கிழக்குக் கடற்கரை சாலையில் மண்மேடாகி போனாலும் கம்பீரம் குலையாமல் இருக்கும் ஒரு கோட்டையும் உண்டு. அது, ஆலம்பரை கோட்டை.

இயற்கை எழில் கொஞ்சும் கிழக்குக் கடற்கரை சாலையில் இடைக்கழிநாடு பேரூராட்சிக்கு உட்பட்ட கடப்பாக்கத்திலிருந்து 3 கி.மீ. தொலைவில் கடற்கரையோரம் அமைந்துள்ளது ஆலம்பரை கோட்டை. ஒரு புறம் கடலாலும் மூன்று புறம் கழிமுகத்தாலும் சூழப்பட்ட பகுதி இது. எனவே இடைக்கழிநாடு என அழைக்கப்படுகிறது.