மும்பையில் இருந்து ஷீரடி, சோலாப்பூருக்கு 2 வந்தே பாரத் ரயில்களை தொடங்கினார் பிரதமர்

மும்பை: மும்பையிலிருந்து சாய்நகர் ஷீரடி, சோலாப்பூர் நகரங்களுக்கு 2 புதிய வந்தே பாரத் ரயில்களை பிரதமர் மோடி நேற்று கொடியசைத்துத் தொடங்கிவைத்தார்.

நாடு முழுவதும் 8 அதிவேக வந்தே பாரத் ரயில்கள் இயக்கப்படுகின்றன. இதில் முதல் ரயில் சேவை தலைநகர் டெல்லி - வாரணாசி இடையே தொடங்கியது. அதைப் போலவே சென்னை-மைசூரு இடையேயும் வந்தே பாரத் ரயில் சேவை தொடங்கப்பட்டுள்ளது. இந்நிலையில் மும்பையிலிருந்து ஷீரடி, சோலாப்பூர் ஆகிய நகரங்களுக்கு 2 புதிய வந்தே பாரத் ரயில் சேவையை பிரதமர் மோடி நேற்று கொடியசைத்து தொடங்கி வைத்தார். இதன் தொடக்க விழா மும்பை சத்ரபதி சிவாஜி மகராஜ் ரயில் முனையத்தில் நேற்று நடைபெற்றது.

மும்பை-சோலாப்பூர் வந்தே பாரத் ரயிலானது 455 கிலோமீட்டர் தூரத்தை 6 மணி நேரம் 30 நிமிடங்களில் கடக்கிறது. இதேபோல் மும்பை-சாய்நகர் ஷீரடி வந்தே பாரத் ரயிலானது 343 கிலோமீட்டர் தூரத்தை 5 மணி நேரம் 25 நிமிடங்களில் கடக்கிறது. நாடு முழுவதும் ஷீரடிக்கு வரும் பக்தர்களுக்கு சேவை அளிக்கவே இந்த வந்தே பாரத் ரயில் தொடங்கப்பட்டுள்ளது.

சாய்நகர் ஷீரடி-மும்பை இடையே இயக்கப்படும் ரயிலில் சேர் கார் இருக்கைக்கு ரூ.840, எக்சிகியூட்டிவ் சேர் கார் இருக்கைக்கு ரூ.1,670 கட்டணமாக வசூலிக்கப்படும்.

கடந்த ஒரு மாதத்தில் 2-வது முறையாக பிரதமர் மோடி, மும்பை வந்துள்ளார். கடந்த மாதம் 19-ம் தேதி மும்பையில் நடைபெற்ற நிகழ்ச்சியில் ரூ.38 ஆயிரம் கோடி மதிப்பிலான கட்டமைப்புத் திட்டங்களுக்கு பிரதமர் மோடி அடிக்கல் நாட்டினார். தற்போது 2-வது முறையாக வந்தே பாரத் ரயில் திட்ட விழாவுக்கு வந்துள்ளார். விரைவில் மும்பை பெருமாநகராட்சிக்கு தேர்தல் நடைபெறவுள்ளது. எனவே, பிரதமர் மோடியின் வருகை மகாராஷ்டிர அரசியலில் முக்கியத்துவம் பெற்றுள்ளது.