Rewind 2022 | ஹிஜாப் முதல் எழுவர் வரை - அதிர்வலைகளை ஏற்படுத்திய உச்ச நீதிமன்ற தீர்ப்புகள்!

இந்தியாவின் உச்சபட்ச நீதிபரிபாலன அமைப்பாக உச்ச நீதிமன்றம் இருந்து வருகிறது. மாநில அரசு மற்றும் உயர் நீதிமன்றங்களால் முடிவு எட்டப்படாத வழக்குகளுக்கு உரிய தீர்வு அல்லது வழிகாட்டுதல்களை உச்ச நீதிமன்றம் பிறப்பித்து வருகிறது. அந்த வகையில் 2022-ம் ஆண்டு உச்ச நீதிமன்றம் பிறப்பித்த தீர்ப்புகள் குறித்து விவரிக்கிறது இந்த செய்தித் தொகுப்பு.

விவாதப் பொருளான ஹிஜாப்: கர்நாடக மாநிலம் உடுப்பி அரசு பி.யூ.கல்லூரியில் 2022 பிப்ரவரி மாதம், முஸ்லிம் மாணவிகள் ஹிஜாப் (முக்காடு), பருதா (முகத்திரை), புர்கா (முழு நீள உடை) அணிந்து வருவதற்கு இந்துத்துவா அமைப்பினர் எதிர்ப்பு தெரிவித்தனர். இதையடுத்து அங்கு ஹிஜாப் அணிய கல்வி நிறுவனத்தால் தடை விதிக்கப்பட்டதால், 6 முஸ்லிம் மாணவிகள் தொடர் போராட்டத்தில் இறங்கினர். தொடர்ந்து மங்களூரு, குந்தாப்பூர், ஷிமோகா, பத்ராவதி, சிக்கமகளூரு உள்ளிட்ட இடங்களிலும் ஹிஜாப் அணிந்து வந்த மாணவிகள் கல்லூரிக்கு வெளியே நிறுத்தப்பட்டனர். அவர்களும் போராட்டத்திலும் ஈடுபட்டனர்.