ஹைதராபாத்: பிரதமர் பாதுகாப்பு பணியில் இருந்த எஸ்.ஐ துப்பாக்கியால் சுட்டு தற்கொலை

ஹைதராபாத்தில் பிரதமர் மோடி வருகையையொட்டி பாதுகாப்புப் பணியில் இருந்த போலீஸ் எஸ்.ஐ ஸ்ரீதர் தன்னைத்தானே துப்பாக்கியால் சுட்டு தற்கொலை செய்து கொண்டார். இதனால் பரபரப்பு ஏற்பட்டுள்ளது.

பிரதமர் நரேந்திர மோடி 2 நாள் சுற்றுப்பயணமாக வெள்ளிக்கிழமை இரவு ஹைதராபாத் வந்தார். இன்று (சனிக்கிழமை) காலை ஹைதராபாத்தில் உள்ள வல்லபாய் பட்டேல் போலீஸ் அகாடமியில் நடைபெற்ற 29 மாநிலங்களின் போலீஸ் டிஜிபிக்கள், ஐ,ஜி, டிஐஜிக்களின் மாநாட்டில் அவர் முக்கிய விருந்தினராக கலந்து கொண்டார்.

அவருடன் மத்திய உள்துறை அமைச்சர் ராஜ்நாத் சிங், இணை உள்துறை அமைச்சர்கள், மத்திய பாதுகாப்பு ஆலோசகர் உட்பட பலர் கலந்து கொண்டனர். இன்று காலை தேசிய போலீஸ் அகாடமிக்கு வந்த பிரதமரை உயர் போலீஸ் அதிகாரிகள் வரவேற்றனர்.

பின்னர் அவர் பணியின் போது உயிர்த் தியாகம் செய்த போலீஸாரின் நினைவுத் தூணுக்கு மலர் வளையம் வைத்து அஞ்சலி செலுத்தினார். இதேபோன்று அங்குள்ள சர்தார் வல்லபாய் பட்டேலின் சிலைக்கும் புஷ்பாஞ்சலி செலுத்தினார். பின்னர் அந்த வளாகத்தில் மரக்கன்று நட்டு உரையாற்றினார்.

இந்நிலையில், பிரதமரின் வருகையையொட்டி, ஹைதராபாத்தில் பலத்த பாதுகாப்பு ஏற்பாடுகள் செய்யப்பட்டிருந்தன. இதில் போலீஸ் அகாடமிக்கு எதிரே உள்ள பிவி எக்ஸ்பிரஸ் பாலம் எனும் பகுதியில் ஸ்ரீதர் எனும் எஸ்.ஐ பாதுகாப்புப் பணியில் இன்று காலை ஈடுபட்டிருந்தார்.

இவர் கொமரம்பீம் மாவட்டம், பெஞ்சுல பீட்டா காவல் நிலைய எஸ்.ஐ யாக பணியாற்றி வந்தார். இந்நிலையில் இன்று காலை இவர் அப்பகுதியில் உள்ள ஓர் அடுக்கு மாடியின் 19வது மாடியில் உள்ள ஓர் அறையில் தன்னுடைய சர்வீஸ் துப்பாக்கியால் சுட்டுக்கொண்டு தற்கொலை செய்து கொண்டார்.

பிரதமர் சுற்றுப்பயணத்தின் போது திடீரென துப்பாக்கிச் சத்தம் கேட்ட அருகில் இருந்த போலீஸார் அதிர்ச்சி அடைந்தனர். இதனால் அங்கு பரபரப்பு ஏற்பட்டது.

பின்னர் தகவல் அறிந்ததும், ஸ்ரீதரின் உடலைக் கைப்பற்றி காந்தி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இது குறித்து ராஜேந்திர நகர் போலீஸார் வழக்கு பதிந்து தொடர்ந்து விசாரணை நடத்தி வருகின்றனர்.