மக்களவை சபாநாயகர் தலைமையில் இன்று அனைத்து கட்சி கூட்டம்

புதுடெல்லி: மக்களவையை சுமுகமாக நடத்துவது தொடர்பாக கட்சித் தலைவர்களுடன் ஆலோசனை நடத்த நாடாளுமன்ற அனைத்துக் கட்சித் தலைவர்களின் கூட்டத்தை மக்களவை சபாநாயகர் ஓம் பிர்லா இன்று கூட்டியுள்ளார்.

நாடாளுமன்ற மழைக்காலக் கூட்டத் தொடர் ஜூலை 18-ம் தேதி முதல் ஆகஸ்ட் 18-ம் தேதி நடைபெறவுள்ளது. இதையடுத்து மழைக்கால கூட்டத் தொடரில் மக்களவையை சுமுகமாக நடத்துவது உள்ளிட்ட பல்வேறு விஷயங்கள் குறித்து விவாதிக்க சபாநாயகர் ஓம் பிர்லா இந்தக் கூட்டத்தைக் கூட்டியுள்ளார். மாலை 4 மணிக்கு கூட்டம் நடைபெறவுள்ளது. இதில் மக்களவையில் உள்ள கட்சிகளின் தலைவர்கள் பங்கேற்கவுள்ளனர்.

இதைப் போலவே மாநிலங்களவையை சுமுகமாக நடத்துவது தொடர்பாக அனைத்துக் கட்சித் தலைவர்கள் கூட்டத்தை குடியரசுதுணைத் தலைவரும், மாநிலங்களவை தலைவருமான வெங்கய்ய நாயுடு கூட்டியுள்ளார். இந்தக் கூட்டம் 17-ம் தேதி நடைபெறவுள்ளது. மழைக்கால கூட்டத் தொடரின்போது குடியரசுத் தலைவர், குடியரசு துணைத் தலைவர் தேர்தல் நடைபெறவுள்ளது குறிப்பிடத்தக்கது.