உ.பி.யில் காங்கிரஸ் பிரச்சாரக் கூட்டங்கள் ரத்து: கரோனா பரவலால் முடிவு

லக்னோ: உத்திரபிரதேசத்தில் அனைத்து அரசியல் பேரணிகளையும் நிகழ்ச்சிகளையும் காங்கிரஸ் இன்று ரத்து செய்தது.

உத்தர பிரதேசத்தில் சட்டப்பேரவை தேர்தலுக்கு இன்னும் சில மாதங்களே உள்ள நிலையில் பல்வேறு கட்சிகளும் பிரச்சாரத்தில் இறங்கியுள்ளன. காங்கிரஸ் பொதுச் செயலாளர் பிரியங்கா காந்தி தலைமையில் அக்கட்சியினர் தீவிர பிரச்சாரத்தில் ஈடுபட்டு வருகின்றனர். உ.பி. காங்கிரஸார் பிரியங்கா காந்தி தலைமையில் ‘‘நான் ஒரு பெண், என்னால் போராட முடியும்’’ என்ற தேர்தல் பிரச்சாரத்தை ஏற்பாடு செய்து வருகிறது.

இதையொட்டி நேற்று பரேலியில் காங்கிரஸின் மாரத்தான் ஓட்டம் நடைபெற்றது. இதில் கூட்ட நெரிசல் போன்ற சூழ்நிலை ஏற்பட்டது. இதுதொடர்பான வீடியோக்கள் சமூகவலைதளத்தில் வெளிவந்தன. மாரத்தானில் ஓடும்போது சில பெண்கள் தடுமாறி தரையில் விழுந்தனர். இதனால் பின்னால் வருபவர்கள் திடீரென தட்டுதடுமாறி தங்களை நிறுத்திக் கொள்ள வேண்டியதாயிற்று.

இதனால் பங்கேற்பாளர்களில் சிலருக்கு காயம் ஏற்பட்டுள்ளது. பங்கேற்பாளர்கள் முகமூடி இல்லாமல் காணப்பட்டனர். கூட்டத்தால் முழு சாலையையும் நிரம்பியது, தொடங்கும் போது, முன்பக்கத்தில் இருந்த சில பெண்கள் தடுமாறி கீழே விழுந்தனர், நூற்றுக்கணக்கானவர்கள் முன்பக்கத்தில் இருந்தவர்களைக் கடக்க முயன்றதால் தள்ளப்பட்டனர்.

கோவிட் வழக்குகளின் அதிகரிப்பு காரணமாக உத்தரப் பிரதேச காங்கிரஸ் தனது ‘‘நான் ஒரு பெண், என்னால் போராட முடியும்’’ என்ற மாரத்தான் நிகழ்ச்சியை ஒத்திவைத்துள்ளது.

நொய்டா, வாரணாசி உட்பட உ.பி.யில் பல்வேறு இடங்களில் வரும் நாட்களில் 7 முதல் 8 மாரத்தான் போட்டிகள் நடத்த திட்டமிடப்பட்டு இருந்தது. இந்தநிலையில் இந்த நிகழ்ச்சி ரத்து செய்யப்பட்டுள்ளது.

உத்தரப் பிரதேச முதல்வர் யோகி ஆதித்யநாத், வியாழன் அன்று கெளதம் புத்த நகர் மாவட்டத்தில் நடைபெற இருந்த அரசு விழாவை ரத்து செய்துள்ளார்.