2-ம் கட்ட கரோனா தடுப்பூசி; பிரதமர் மோடி, மாநில முதல்வர்களுக்கு வழங்க திட்டம்

இரண்டாம் கட்டமாக கரோனா தடுப்பூசி போடப்படும்போது பிரதமர் மோடி மற்றும் 50- வயதுக்கு மேற்பட்ட மாநில முதல்வர்களுக்கும் போடப்படும் எனத் தகவல் வெளியாகியுள்ளது.

சீனாவில் உருவான கரோனா வைரஸ், கடந்த ஆண்டு மார்ச் மாதத்தில் இந்தியாவில் பரவத் தொடங்கியது. வைரஸ் தொற்று பரவலை கட்டுப்படுத்த நாடுமுழுவதும் பொதுமுடக்கம் உள்ளிட்ட பல்வேறு முன்னெச்சரிக்கை நடவடிக்கைகளை மத்திய அரசு எடுத்தது. இதன்காரணமாக வைரஸ் தொற்று படிப்படியாக குறைந்தது.

கரோனா வைரஸ்தடுப்பூசி தயாரிக்கும் பணிகள், பல்வேறு நாடுகளில் தீவிரப்படுத்தப்பட்டன. இந்தியாவில் மகாராஷ்டிர மாநிலம் புனேவில் உள்ள சீரம் இன்ஸ்டிடியூட் தயாரித்த ‘கோவிஷீல்டு’, ஹைதராபாத்தில் உள்ள பாரத் பயோடெக் நிறுவனம் உருவாக்கிய ‘கோவேக்ஸின்’ ஆகிய தடுப்பூசிகளுக்கு மத்திய அரசு அனுமதி வழங்கியது.

இதையடுத்து, தமிழகம் உட்படநாடு முழுவதும் 2 கட்டங்களாக கரோனா தடுப்பூசி போடும் பணிக்கான ஒத்திகை நடத்தப்பட்டது. இதனைத் தொடர்ந்து ஜனவரி 16-ம் தேதி அன்று பிரதமர் மோடியால் தொடங்கி வைக்கப்பட்டது. நாடு தழுவிய மிகப்பெரிய கோவிட்-19 தடுப்பு மருந்து வழங்கல் திட்டத்தின் கீழ் நேற்று வரை 8,06,48 பயனாளிகளுக்கு தடுப்பு மருந்து வழங்கப்பட்டுள்ளது.

தடுப்பு மருந்து பெற்றுக்கொண்டவர்களில் சிறிய அளவிலான உபாதைகள் ஏற்பட்டவர்களில் ஒரு சிலர் மட்டுமே மருத்துவமனை அனுமதி தேவைப்பட்டது.

முதல்கட்டமாக 3 கோடி முன்களப் பணியாளர்களுக்கு தடுப்பூசி போடப்படும் என அறிவிக்கப்பட்டுள்ளது. நாடு முழுவதும் 3,006 மையங்களில் தடுப்பூசி போடும் பணிகள் அடுத்த சில மாதங்களுக்கு தொடர்ந்து நடக்கும் என்று மத்திய சுகாதாரத் துறை அமைச்சகம் அறிவித்துள்ளது.

இந்தநிலையில் முன்களப் பணியாளர்களுக்கு தடுப்பூசி போடப்பட்ட பிறகு 2-ம் கட்டமாக மூத்த குடிமக்களுக்கு தடுப்பூசி போட்டப்படும் என ஏற்கெனவே அறிவிக்கப்பட்டுள்ளது.

இரண்டாம் கட்டமாக கரோனா தடுப்பூசி போடப்படும்போது பிரதமர் மோடி மற்றும் 50- வயதுக்கு மேற்பட்ட மாநில முதல்வர்களுக்கும் போடப்படும் எனத் தகவல் வெளியாகியுள்ளது.
50 வயதுக்கு மேற்பட்ட எம்.பி.க்கள், எம்எல்ஏகளுக்கும் இதே சமயத்தில் தடுப்பூசி போட நடவடிக்கை எடுக்கப்பட்டு வருவதாக தகவல் வெளியாகியுள்ளது.