பஞ்சாபில் கரோனா சமூக பரவல் அச்சம்;  மே 1-ம் தேதி வரை ஊரடங்கு நீட்டிப்பு: முதல்வர் அம்ரீந்தர் சிங் அறிவிப்பு

பஞ்சாபில் மே 1-ம் தேதி வரை ஊரடங்கு உத்தரவு நீட்டிக்கப்படுவதாக அறிவிக்கப்பட்டுள்ளது.

கரோனா வைரஸைக் கட்டுப்படுத்த சமூக இடைவெளி அவசியம் என்பதால் பிரதமர் மோடியின் அறிவிப்புபடி, நாடுமுழுவதும் 21 நாட்கள் ஊரடங்கு உத்தரவு அமல்படுத்தப்பட்டுள்ளது.

இதனால் மக்கள் தேவையின்றி வெளியே வர தடை விதிக்கப்பட்டுள்ளது. அத்தியாவசியப் பொருட்கள் கொண்டு செல்ல மட்டுமே அனுமதி வழங்கப்பட்டுள்ளது. வர்த்தக நிறுவனங்கள், தொழிற்சாலைகள் கல்வி நிறுவனங்கள், வழிபாட்டு ஸ்தலங்கள் என அனைத்தும் மூடப்பட்டுள்ளன.

மதக்கூட்டங்கள், சமூக கூட்டங்கள் என அனைத்திற்கும் அனுமதி மறுக்கப்பட்டுள்ளது. போக்குவரத்தும் முழுமையாக முடக்கப்பட்டுள்ளது. இந்த ஊரடங்கு உத்தரவு ஏப்ரல் 30ம்- தேதி நீட்டிக்கப்படும் என தகவல்கள் வெளியாகி வருகின்றன.

இந்தநிலையில் பஞ்சாபில் மே 1-ம் தேதி வரை ஊரடங்கு உத்தரவு நீட்டிக்கப்படுவதாக அறிவிக்கப்பட்டுள்ளது. இதுகுறித்து கேப்டன் அம்ரீந்தர் சிங் காணொலிக் காட்சி மூலம் செய்தியாளர்களுக்கு பேட்டியளித்தார்.

அப்போது அவர் கூறுகையில் ‘‘பஞ்சாபில் வெளிநாடுகளுக்குச் செல்லாத, வேறு எந்த வகையிலும் தொடர்பு இல்லாத 27 பேருக்கு கரோனா வைரஸ் தொற்றியுள்ளது. இதனால் கரோனா வைரஸ் சமூக பரவல் என்ற கட்டத்தை நோக்கி நகர்வதாகவே எண்ண வேண்டியதுள்ளது.’’ எனக் கூறினார்.