கரோனா வைரஸ் அபாயகரமான நோய்க்கிருமி, பயிற்சியில்லாமல் சாம்பிள்களைக் கையாள்வது ஆபத்தானது: சோதனைக்கூடங்களுக்கு ஐ.சி.எம்.ஆர். எச்சரிக்கை

பயோடெக்னாலஜி துறை, அறிவியல் மற்றும் தொழில்நுட்பத் துறை, அறிவியல் மற்றும் தொழிற்துறை ஆராய்ச்சி கவுன்சில், அணுசக்தி துறை ஆகியவற்றின் பரிசோதனை மையங்களில் கோவிட்-19 சாம்பிள்களை சோதனை செய்ய ஐ.சி.எம்.ஆர். என்று அழைக்கப்படும் இந்திய மருத்துவ ஆய்வுக் கழகம் அனுமதி வழங்கியுள்ளது.

ஆனால் பயோடெக்னாலஜி துறை, அறிவியல் மற்றும் தொழில்நுட்பத் துறை, அறிவியல் மற்றும் தொழிற்துறை ஆராய்ச்சி கவுன்சில், அணுசக்தித் துறை, ஆகியவற்றின் மருத்துவப் பரிசோதனை நிலையங்கள் ஆகியவை இந்திய மருத்துவ ஆய்வுக் கழகத்தின் வழிகாட்டு நெறிமுறைகளை கண்டிப்பாக கடைபிடிக்குமாறு அறிவுறுத்தப்பட்டுள்ளது.

ஆனால் ஐசிஎம்ஆர் எச்சரிக்கை விடுக்கும் போது, “சார்ஸ் சிஓவி-2 வைரஸ் என்பது ஒரு அதி ஆபத்து நோய்க்கிருமி வகையாகும், இதற்கு அடுத்தவரைத் தொற்றும் தன்மை, அதிவேகமாகப் பரவும் தன்மை அதிகம். எனவே கொரோனா வைரஸ் சாம்பிள்களை அதிக பரிசோதனைக் கூடங்களில் கையாள்வது, அதிலும் போதிய பயிற்சியில்லாத பணியாளர்கள் சாம்பிள்களை கையாள்வது வைரஸ் வெளியே சிதற வாய்புள்ளது, இதனால் பரிசோதனைச்சாலைகளில் தொற்று பரவும் அபாயம் உள்ளது” என்று எச்சரித்துள்ளது.

மேலும் ஐசிஎம்ஆர் இவர்களுக்கு நோய்க்கணிப்பு சாதனத் தொகுப்பை வழங்காது, மேலும் சாம்பிளை அரசு சுகாதார அதிகாரிகள் அல்லது அரசு ஒருங்கிணைந்த நோய்க்கண்காணிப்புத் திட்ட அதிகாரிகள் சாம்பிளை அனுப்பினால் மட்டுமே சோதனை நடத்தலாம்.

இந்த ஆய்வு நிறுவனங்கள் மற்ற ஆய்வு அமைப்புகளின் கீழ் முக்கியத்துவம் வாய்ந்தது என்பதால் ஐசிஎம்ஆர் இந்த பரிசோதனைக் கூடங்களை மதிப்பிட்டு, அனுமதி வழங்கும் நடைமுறைகளை மேற்கொள்ளாது.

எனவே சாம்பிள்களைக் கையாள்வது முதல் இந்தச் சோதனைச்சாலைகளின் பிற நடைமுறைகள் சார்ந்த பொறுப்புகள் இந்தத் துறை சார்ந்ததே தவிர ஐசிஎம்ஆர் சார்ந்தது இல்லை.

மேலும் இந்த பரிசோதனைக் கூடங்கள் ஐடிஎஸ்பி அரசு அதிகாரிகளிடத்தில் ரிப்போர்ட் செய்வதை உறுதி செய்யவேண்டும். பயோமெடிக்கல் கழிவு நிர்வாகம் முதல் தொடர்புத் தடம் காணுதல் என்ரு கடுமையான நிறுவனக் கொள்கைகளைக்கடைபிடிக்க அறிவுறுத்தப்படுகிறார்கள்.