ஜெகன் மோகனை கடவுளுடன் ஒப்பிட்ட ரோஜா: சமூக வலைதளங்களில் பொதுமக்கள் கொந்தளிப்பு

ஒய்எஸ்ஆர் காங்கிரஸ் கட்சி தலைவர் ஜெகன் மோகனை அக்கட்சியின் சட்டமன்ற உறுப்பினரான நடிகை ரோஜா, கடவுளுடன் ஒப்பிட்டதால் கடும் எதிர்ப்பு கிளம்பி உள்ளது.

ஒய்எஸ்ஆர் காங்கிரஸ் கட்சியின் மாநில மகளிர் அணி தலைவியுமான ரோஜா, தனது சமூக வலைதள பக்கத்தில், ஜெகன் மோகனுக்கு புகழாரம் சூட்டியுள்ளார்.

இதில் அவர், “ஆந்திர முதல்வர் சந்திரபாபு நாயுடுவுக்கு ஆதரவாக செயல்படும் ஊடகங்கள் ஜெகனின் நற்குணங்களை யாரும் அறிந்துகொள்ளாத வகையில் அவரை தவறாக சுட்டிக்காட்டுகின்றன. யேசு, ராமர், கிருஷ்ணர், அல்லாவின் நற்குணங்களை அந்தந்த மத நூல்கள் சுட்டிக்காட்டின. எனவேதான் அவர்களை நாம் கடவுள்களாக போற்றி வணங்குகிறோம்.

ஆனால் அதே நூல்கள் நமக்கு தவறாக சுட்டிக்காட்டி இருந்தால், நாம் கடவுள்களாக கும்பிட மாட்டோம். அதேபோன்று தான் ஜெகன் மோகனை இந்த சமுதாயத்திற்கு தவறாக அடையாளம் காட்டும் முயற்சி நடக்கிறது. அவரது நல்ல குணங்கள் எனக்கு நன்றாகத் தெரியும்” என்று குறிப்பிட்டுள்ளார்.

இதற்கு பொதுமக்களிடையே பலத்த எதிர்ப்பு கிளம்பியுள்ளது.