ரயில்வே பட்ஜெட்: சேலம்-ஓமலூர் இடையே இரட்டை ரயில் பாதை

ரயில்வே இடைக்கால பட்ஜெட்டில், 2014-15-ம் ஆண்டில் 19 புதிய ரயில் பாதைகளை அமைப்பது தொடர்பாக ஆய்வு நடத்த திட்டமிடப்பட்டுள்ளது. மேலும் இரட்டை ரயில் பாதைகளை அமைப்பது தொடர்பான திட்டங்கள் குறித்தும் ஆய்வு நடத்தப்படவுள்ளது.

அதன்படி தமிழகத்தில் சேலம்- ஓமலூர் இடையே இரட்டை ரயில் பாதை அமைக்கப்படும் என்று தெரிவிக்கப்பட்டுள்ளது.

மேலும் திண்டிவனம்- நகரி இருப்புப் பாதை திட்டத்தை புதுச்சேரி வரை நீட்டிக்க ஆய்வு செய்யப்படும் என்றும் பட்ஜெட்டில் அறிவிக்கப்பட்டுள்ளது.

2013-14-ம் நிதியாண்டில் ரயில்வேயில் 1532 கி.மீட்டர் தொலைவுக்கு புதிய ரயில் பாதைகள் அமைக்கப்பட்டுள்ளன. கரூர்- சேலம் இடையே 85 கி.மீட்டர் தொலைவுக்கு இருப்புப் பாதை அமைக்கப்பட்டுள்ளன.

நாடு முழுவதும் 2027 கி.மீட்டர் தொலைவுக்கு புதிதாக இருப்புப் பாதைகளும், 2227 கி.மீட்டர் தொலைவுக்கு இரட்டை பாதைகளும் அமைக்கப்பட்டுள்ளன. 4556 கி.மீட்டர் தொலைவுக்கு மின்மயமாக்கப்பட்டுள்ளது.