ஆந்திராவில் ரூ.1 கோடி மதிப்பிலான தங்கம் பறிமுதல்: 2 பேர் கைது

சென்னையிலிருந்து ரயிலில் ஆந்திராவுக்கு தங்கம் கடத்திய 2 பேரை போலீஸார் நேற்று கைது செய்தனர். அவர்களிடமிருந்து ரூ.1.10 கோடி மதிப்பிலான தங்கக் கட்டிகள் பறிமுதல் செய்யப்பட்டன.

சென்னையிலிருந்து ஆந்திரா வரும் ரயிலில் தங்கம் கடத்தப்படுவதாக ரயில்வே போலீஸாருக்கு தகவல் கிடைத்தது. இதன்பேரில், ஆந்திரா வரும் அனைத்து ரயில்களிலும் போலீஸார் நேற்று தீவிர சோதனை நடத்தினர். அதன்படி, சென்னையிலிருந்து ஆந்திரா நோக்கி வந்த சேஷாத்ரி எக்ஸ்பிரஸ் ரயிலில் சோதனையிட்டபோது, அங்கிருந்த இரண்டு பயணிகளிடம் 3.5 கிலோ எடையிலான தங்கக் கட்டிகள் இருப்பது கண்டுபிடிக்கப்பட்டது. இதன் மதிப்பு ரூ.1.10 கோடியாகும். ஆனால், அந்தத் தங்கக் கட்டிகளுக்கான எந்த ரசீதும் அவர்களிடம் இல்லை.

விசாரணையில், அவர்கள், ஆந்திராவின் குண்டூர் மாவட்டத்தைச் சேர்ந்த பிரபாகர் ராவ், ஆஞ்சி பாபு என்பதும், அதே பகுதியில் உள்ள ஒரு நகைக்கடையில் பணிபுரிந்து வருவதும் தெரியவந்தது. இதையடுத்து, அவர்களை தெனாலி ரயில்வே போலீஸார் கைது செய்து வருவாய் துறை அதிகாரிகளிடம் ஒப்படைத்தனர்.