மகா கும்பமேளாவில் 5 லட்சம் பேருக்கு இலவச கண் சிகிச்சை: 240 பிரபல மருத்துவமனைகளுடன் ஒப்பந்தம்

புதுடெல்லி: உத்தர பிரதேச மகா கும்​பமேளா​வில் 5 லட்சம் பேருக்கு இலவச கண் சிகிச்சை அளிக்​கப்பட உள்ளது. இதற்காக நாடு முழு​வ​தி​லும் உள்ள பிரபல 240 கண் மருத்​துவ​மனை​களுடன் மாநில அரசு ஒப்பந்தம் செய்​துள்ளது.

உ.பி.​யின் பிரயாக்​ராஜில் அடுத்த ஆண்டு ஜனவரி 13-ம் தேதி மகா கும்​பமேளா தொடங்​கு​கிறது. இதில் முதல் முறையாக பல உலக சாதனைகளை படைக்க மாநில அரசு திட்​டமிட்​டுள்​ளது. இந்த வகையில், மகா கும்​பமேளா​வுக்கு வருபவர்​களில் சுமார் 5 லட்சம் பேருக்கு இலவச கண் சிகிச்சை அளிக்​கப்பட உள்ளது. அப்போது கண் அறுவை சிகிச்சை தேவைப்​படு​வோருக்​கும் அதை இலவச​மாகவே அளிக்க ஏற்பாடுகள் செய்​யப்​படு​கின்றன. ஜனவரி 5-ம் தேதி ‘‘நேத்ரா கும்ப் (கண் கும்​ப)’’ எனும் பெயரில் திரிவேணி சங்கமத்​தில் இதற்கான முகாம் தொடங்கி வைக்​கப்பட உள்ளது.

இதன் நிர்​வாகக் குழு உறுப்​பினர்​களில் ஒருவரான டாக்டர் ரஞ்சன் வாஜ்பாய் கூறும்​போது, ‘‘கடந்த ஆண்டு கும்​பமேளாவை விட இந்த மகா கும்​பமேளா​வில் 2 மடங்​குக்​கும் அதிக எண்ணிக்கை​யில் இலவச சிகிச்சை அளிக்​கப்பட உள்ளது. மூன்று லட்சம் பேருக்கு இலவச மூக்கு கண்ணாடி​யும் அளிக்​கப்பட உள்ளது. இதற்கான மருத்துவ முகாம் சுமார் 10 ஏக்கர் நிலப்​பரப்​பில் அமைக்​கப்​படு​கிறது. 140 மருத்​துவர்கள் பணியாற்றும் முகாமில் தினமும் சுமார் 10,000 பேருக்கு இலவச கண் பரிசோதனை செய்​யப்​படும்’’ என்றார்.

ஜனவரி 5-ம் தேதி இதற்கான முகாமை ஜுனா அகாலா தலைவர் ஆச்சா​ரியா மகா மண்டலேஷ்வர் அவ்தேஷானந்த் கிரி மகராஜ் தொடங்கி வைக்​கிறார். ஒரே இடத்​தில் பெரும் எண்ணிக்கை​யில் சர்வதேச அளவில் இலவச கண் சிகிச்சை நடைபெற்​றதற்காக கின்னஸ் சாதனை பதிவு செய்ய உ.பி. அரசு திட்​ட​மிட்​டுள்​ளது. இதே மகா கும்​பமேளா​வில் இந்திய ராணுவத்​தின் சார்​பிலும் தனியாக இலவச கண் சிகிச்சை முகாம் நடத்த திட்​ட​மிடப்​பட்​டுள்​ளது.

இத்துடன், பார்​வை​யாளர்​களைக் கவரும் வகையில் லேசர் வண்ண நிகழ்ச்​சிகள் நடைபெற உள்ளன. மாலை​யில் 2,000 டிரோன்​கள் வானில் பறந்த படி புராணங்​களின் ​காட்​சிகள் லேசர் ஒளிவண்​ணத்​தில் நிகழ்​த்​தி ​காட்​ட உ.பி. சுற்​றுலா துறை ஏற்​பாடு செய்​துள்​ளது.