பெண் தொழிலதிபரை ஆடையை களைந்து அவமதித்ததால் தற்கொலை: பெங்களூரு பெண் போலீஸ் அதிகாரி மீது வழக்கு

பெங்களூரு: கர்​நாடகா போவி மேம்​பாட்டு ஆணையத்​தில் கடந்த 2021-22-ம் ஆண்டில் போவி உறுப்​பினர்​களுக்கு வேலை​வாய்ப்புத் திட்​டத்​தின் கீழ் கடனுக்காக ஒதுக்​கப்​பட்ட நிதி​யில் ஊழல் நடந்​ததாக புகார் எழுந்​தது. இதுதொடர்பாக சிக்​கபள்​ளாப்​பூர், தொட்​டபள்​ளாபூர், கலபுரகி ஆகிய இடங்களில் வழக்​குகள் பதிவான நிலை​யில், அந்த வழக்​குகள் சிறப்பு புலனாய்வு பிரிவு போலீ​ஸாரிடம் ஒப்படைக்​கப்​பட்டன.

இதுகுறித்து கடந்த 14-ம் தேதி பெங்​களூரு​வில் உள்ள பத்ம​நாபா நகரை சேர்ந்த‌ பெண் தொழில​திபர் ஜீவா (33) என்பவரிடம் போலீ​ஸார் விசாரணை நடத்​தினர். இந்நிலை​யில் கடந்த சனிக்​கிழமை இரவு தனது வீட்​டில் ஜீவா தற்கொலை செய்​து​கொண்​டார். அவர் இறப்​ப​தற்கு முன்பு எழுதி​ய​தாகக் கூறப்​படும் 11 பக்க தற்கொலை கடிதத்​தில், ‘‘கடந்த 14-ம் தேதி முதல் 22-ம் தேதி வரை போலீஸ் விசா​ரணைக்கு ஆஜரானேன். அப்போது சிறப்பு புலனாய்வுபிரி​வின் துணை காவல் கண்காணிப்​பாளர் கனகலட்​சுமி என்னை மனரீ​தி​யாக​வும், உடல் ரீதி​யாக​வும் துன்​புறுத்​தினார்.

விசா​ரணை​யின் போது எனது ஆடைகளை களைந்து, சயனைடு கொண்டு வந்திருக்​கிறேனா? என்று கேட்​டார். மேலும், இவ்வழக்​கில் இருந்து என்னை விடுவிக்க ரூ.25 லட்சம் லஞ்சம் கேட்​டார். அவர் அளித்த ஆவணங்​களில் கையெழுத்திட மறுத்​த​தால் கடுமையாக மிரட்​டி​னார்” என குறிப்​பிடப்​பட்​டுள்​ளது.

இதுகுறித்து உயிரிழந்த ஜீவா​வின் சகோதரி சங்கீதா பனசங்கரி போலீஸ் நிலை​யத்​தில் புகார் அளித்​தார். உயிரிழந்த ஜீவா​வின் உடலை கைப்​பற்றிய போலீ​ஸார் பிரேத பரிசோதனைக்காக விக்​டோரியா மருத்​துவ​மனைக்கு அனுப்பி வைத்​தனர். இந்த புகார் குறித்து விசா​ரித்த போலீ​ஸார், ‘‘பெண் தொழில​திபரை மிரட்டிய சிறப்பு புலனாய்வு பிரிவு துணை காவல் கண்காணிப்​பாளர் கனகலட்​சுமி மீது ஊழல் தடுப்புச் சட்​டம் பிரிவு 7, பார​திய நியாய சன்​ஹிதா பிரிவு 108 ஆகிய​வற்றின் கீழ் வழக்​குப் ப​திவு செய்​யப்​பட்​டுள்​ளது" என்று தெரி​வித்​தனர்​.