பாஜக 2022 - 23 நிதி ஆண்டில் மட்டும் ரூ.720 கோடியை நன்கொடையாக பெற்றுள்ளது. இது காங்கிரஸ், ஆம் ஆத்மி, மார்க்சிஸ் கம்யூனிஸ்ட் கட்சி உள்ளிட்ட தேசிய கட்சிகள் சென்ற நிதி ஆண்டில் பெற்ற மொத்த நன்கொடையை விட 5 மடங்கு அதிகம் ஆகும். கட்சிகள் ரூ.20 ஆயிரத்துக்கு மேல் பெறும் நன்கொடைகள் குறித்த விவரங்களை தேர்தல் ஆணையத்திடம் தெரிவிக்க வேண்டும்.
இதன்படி, கடந்த 2022-23 நிதி ஆண்டில், தேசிய கட்சிகளுக்கு 12,167 நன்கொடையாளர்கள் மூலம் ரூ.850.43 கோடி நன்கொடை வந்துள்ளது என்று ஜனநாயக சீர்திருத்தங்களுக்கான சங்கம் ( ஏடிஆர் ) தெரிவித்துள்ளது. இது 2021-22 நிதி ஆண்டுடன் ஒப்பிடுகையில் 12 சதவீதம் அதிகம் ஆகும்.
2022-23 நிதி ஆண்டில் 7,945 நன்கொடையாளர்கள் மூலம் பாஜக ரூ.719.85 கோடி நன்கொடை பெற்றுள்ளது. அதுவே காங்கிரஸுக்கு 894 நன்கொடை யாளர்கள் மூலம் ரூ.79.92 கோடி வந்துள்ளது. தேசிய கட்சியான பகுஜன் சமாஜ், 2022-23 நிதி ஆண்டில் தாங்கள் எந்த நன்கொடையும் பெறவில்லை என்று தெரிவித்துள்ளது.
பாஜக உட்பட தேசிய கட்சிகளுக்கு வந்த நன்கொடையில் ரூ.276.20 கோடி டெல்லியிலிருந்தும், ரூ.160.50 கோடி குஜராத்திலிருந்தும், ரூ.96.27 கோடி மகாராஷ்டிராவிலிருந்தும் வந்துள்ளன.
» மத்திய பிரதேச மாநில காங்கிரஸ் முன்னாள் முதல்வர் கமல்நாத், மகன் நகுல்நாத் பாஜக.வில் இணைய முடிவு?
மொத்த நன்கொடையில் ரூ.680.49 கோடி கார்ப்பரேட் நிறுவனங்கள் மூலம் வந்துள்ளன. பாஜக பெற்ற நன்கொடையில் கார்ப்பரேட் நிறுவனங்களின் பங்களிப்பு 80 சதவீதம் ஆகும். 2021 - 22 நிதி ஆண்டில் பாஜக பெற்ற நன்கொடை ரூ.614.62 கோடி ஆகும். அதனுடன் ஒப்பிடுகையில் 2022-23 நிதி ஆண்டில் அக்கட்சி பெற்ற நன்கொடை 17.12 சதவீதம் அதிகரித்துள்ளது. காங்கிரஸ் 2021-22 நிதி ஆண்டில் ரூ.95.45 கோடி நன்கொடை பெற்றுள்ளது. சென்ற நிதி ஆண்டில் அது 16.27 சதவீதம் குறைந்துள்ளது.