பாரத் ஜோடோ யாத்திரையின் போது தனக்கு பதில் ‘டூப்’ பயன்படுத்திய ராகுல் காந்தி: விரைவில் அம்பலப்படுத்துவதாக அசாம் முதல்வர் தகவல்

குவாஹாட்டி: `பாடி டபுள்` எனப்படும் டூப் ஆட்களை காங்கிரஸ் மூத்த தலைவர் ராகுல் காந்தி பயன்படுத்துகிறார். அந்த ‘டூப்’ நபரின் பெயர் விவரங்களை விரைவில் அம்பலப்படுத்துவோம் என்று அசாம் முதல்வர் ஹிமந்தா பிஸ்வா சர்மா தெரிவித்துள்ளார்.

திரைப்பட நடிகர், பிரபலமான அரசியல்வாதிகள், நாட்டுத் தலைவர்கள் `பாடி டபுள்’ எனப்படும்டூப் நடிகர்களை பயன்படுத்துவார்கள். அவர்களது உயிருக்கு அச்சுறுத்துதல் இருக்கும் நிலையில் வெளியில் தோன்றும்போது அவர்கள் `பாடி டபுள்’ ஆட்களை பயன்படுத்துவர். தற்போது காங்கிரஸ் மூத்த தலைவர் ராகுல் காந்தியும் அதேபோன்று `பாடி டபுள்’ ஆட்களை பயன்படுத்துவதாக அசாம் முதல்வர் ஹிமந்தா பிஸ்வா சர்மா தெரிவித்துள்ளார். அவர் மேலும் கூறியதாவது:

ராகுல் காந்தியின் பாரத் ஜோடோ நியாய யாத்திரை அசாமில் கடந்த ஜனவரி 18-ம் தேதி முதல் 25-ம் தேதி வரை நடைபெற்றது. அப்போது யாத்திரையின் பல இடங்களில் ராகுல் காந்தியைப் போன்ற ஒரு நபர், ராகுலுக்குப் பதிலாக யாத்திரையில் இடம்பெற்றார். இதன்மூலம், ராகுல் காந்தி தனது யாத்திரையில் `பாடி டபுள்’ டூப் ஆட்களை பயன்படுத்துகிறார் என்பதை நாங்கள் கண்டறிந்துள்ளோம்.

அசாமுக்கு பிரதமர் மோடி வரும் 4-ம் தேதி வருகிறார். அவர் வந்து சென்றதும் ராகுல் காந்தியின் `பாடி டபுள்’ யார் என்பதை நாங்கள் வெளி உலகுக்கு தெரியப்படுத்துவோம்.

அசாமில் யாத்திரை நடத்தியபோது ராகுல் காந்தியைப் போன்றே இருக்கும் நபர் தொண்டர்களை நோக்கி கையசைத்தபடியே வேனில் சென்றார். யாத்திரை முடிந்த நிலையில் `பாடி டபுள்’ நபர், குவாஹாட்டியிலிருந்து புறப்பட்டு, மேற்கு வங்கத்துக்குச் சென்றுவிட்டார். அவர் யாரென்பதை விரைவில் தெரிவிக்கிறோம்.

இவ்வாறு அசாம் முதல்வர் ஹிமந்தா பிஸ்வா தெரிவித்தார்.