முத்து பல்லக்கில் பத்மாவதி தாயார் பவனி

திருப்பதியை அடுத்துள்ள திருச்சானூர் பத்மாவதி தாயார் கோயிலில் நடைபெற்று வரும் வருடாந்திர பிரம்மோற்சவ விழாவின் 3-ம் நாளான நேற்று காலையில் முத்துப்பல்லக்கு வாகனத்தில் தாயார் பவனி வந்து பக்தர்களுக்கு அருள் பாலித்தார்.

திருப்பதி அருகே உள்ள திருச்சானூர் பத்மாவதி தாயார் கோயிலில், கார்த்திகை பிரம்மோற்சவ விழா கடந்த 15-ம் தேதி கொடியேற்றத்துடன் கோலாகலமாகத் தொடங்கியது. இதில் தினமும் காலை, இரவு ஆகிய இரு வேளைகளிலும் பல்வேறு வாகனங்களில் தாயார் பவனி வந்து பக்தர்களுக்கு அருள் பாலித்து வருகிறார். 3-ம் நாளான நேற்று காலையில் கொட்டும் மழையிலும் முத்துப்பல்லக்கு வாகனத்தில் 4 மாட வீதிகளில் தாயார் பவனி வந்து பக்தர்களுக்கு அருள் பாலித்தார். இதைத் தொடர்ந்து இரவில் சிம்ம வாகனத்தில் வந்து பத்மாவதி தாயார் பக்தர்களுக்கு காட்சியளித்தார்.