வரி பங்கீடாக ரூ.1.18 லட்சம் கோடியை மாநிலங்களுக்கு வழங்கியது மத்திய அரசு

புதுடெல்லி: மாநில அரசுகளுக்கு வரி பங்கீடாக ரூ.1.18 லட்சம் கோடியை மத்திய அரசு வழங்கி உள்ளது.

இதுகுறித்து மத்திய நிதியமைச்சகம் நேற்று வெளியிட்ட அறிக்கையில், “மாநில அரசுகளுக்கு 3-வது தவணை வரி பங்கீடாக ரூ.1,18,280 கோடியை மத்திய அரசு ஜூன் 12-ம் தேதி விடுவித்துள்ளது. இது வழக்கமாக மாதந்தோறும் விடுவிக்கப்படும் ரூ.59,140 கோடியைவிட அதிகம்” என கூறப்பட்டுள்ளது.

ஜூன் 2023-ல் விடுவிக்க வேண்டிய வழக்கமான தவணையுடன் கூடுதலாக ஒரு தவணைத் தொகைவழங்கப்பட்டுள்ளது. மூலதன செலவை விரைவுபடுத்தவும், வளர்ச்சி அல்லது நலத்திட்டங்களுக்கான செலவை சமாளிக்கவும், முன்னுரிமை திட்டங்களுக்கான ஆதாரங்கள் கிடைப்பதை உறுதி செய்யவும் இந்த தொகை வழங்கப்பட்டுள்ளது.

14 தவணைகளாக..: மத்திய அரசால் ஒரு நிதியாண்டில் வசூலிக்கப்படும் வரித் தொகையில் 41 சதவீதத்தை 14 தவணைகளாக மாநில அரசுகளுக்கு பகிர்ந்தளிக்கப்பட்டு வருகிறது என்பது குறிப்பிடத்தக்கது.