எம்ஜிஆர் மருத்துவ பல்கலை. துணைவேந்தர் சுதா சேஷய்யன் ஓய்வு

சென்னை: தமிழ்நாடு டாக்டர் எம்ஜிஆர் மருத்துவப் பல்கலைக்கழகத்தின் துணைவேந்தர் பொறுப்பில் இருந்து மருத்துவர் சுதா சேஷய்யன் நேற்று ஓய்வு பெற்றார்.

தமிழ்நாடு டாக்டர் எம்ஜிஆர் மருத்துவப் பல்கலைக்கழகம் 1987-ம் ஆண்டு தொடங்கப்பட்டது. பல்கலைக்கழகத்தின் 10-வது துணைவேந்தராக மருத்துவர் சுதா சேஷய்யன் 2018-ம் ஆண்டு டிசம்பர் 31-ம் தேதி பொறுப்பேற்றார். அவரது பதவிக்காலம் 2021-ம் ஆண்டு டிசம்பர் 30-ம் தேதியுடன் நிறைவடைந்தது.

இதையடுத்து, புதிய துணைவேந்தரை தேர்வு செய்வற்கான குழு அமைக்கப்பட்டது. இதற்கிடையே சுதா சேஷய்யனுக்கே 2022 டிசம்பர் 30-ம் தேதி வரை பதவி நீட்டிப்பு வழங்கி ஆளுநர் ஆர்.என்.ரவி உத்தரவிட்டார்.

தொடர்ந்து 4 ஆண்டுகள் துணைவேந்தராக இருந்த சுதா சேஷய்யன் அப்பொறுப்பில் இருந்து நேற்று ஓய்வு பெற்றார்.

பல்கலைக்கழக வளாகத்தில் நடந்த பிரிவு உபசார விழாவில் பல்கலைக்கழக நிர்வாகிகள், மருத்துவத் துறையினர் கலந்துகொண்டு சுதா சேஷய்யனுக்கு வாழ்த்து தெரிவித்தனர். அடுத்த துணைவேந்தரை தேர்வு செய்வதற்கான பணிகள் விரைவில் தொடங்க உள்ளது.