அரசு சட்ட கல்லூரிகளில் உதவி பேராசிரியர் தேர்வுக்கான வயது வரம்பை உயர்த்த கோரிக்கை

சென்னை: அரசு சட்டக் கல்லூரி உதவி பேராசிரியர் தேர்​வுக்கான வயது வரம்பை உயர்த்த வேண்​டும் என்று கவுரவ விரிவுரையாளர்கள் கோரிக்கை விடுத்​துள்ளனர்.

இதுகுறித்து அரசு சட்டக் கல்லூரி​களில் பணியாற்றி வரும் கவுரவ விரிவுரை​யாளர்கள் கூறியதாவது: நாங்கள் கடந்த 15 ஆண்டு காலமாக அரசு சட்டக் கல்லூரி​களில் பணியாற்றி வருகிறோம். தகுதிவாய்ந்த கவுரவ விரிவுரை​யாளர்களை பணிவரன்​முறை செய்து பணிநிரந்​தரம் செய்​துதர தொடர்ந்து வேண்​டு​கோள் விடுத்​தும் அரசு இதுவரை ஒரு நடவடிக்கை​யும் எடுக்க​வில்லை. இந்தச் சூழ்​நிலை​யில், அரசு சட்டக்​கல்​லூரி உதவி பேராசிரியர் தேர்வு தொடர்பான அறிவிப்பை ஆசிரியர் தேர்வு வாரியம் விரை​வில் வெளியிட உள்ளதாக அறிகிறோம். சட்டக்​கல்​லூரி உதவி பேராசிரியர் தேர்​வுக்கு முன்பு வயது வரம்பு 57 ஆக இருந்து வந்த நிலை​யில் அது கடந்த 2022-ம் ஆண்டு மே மாதம்40 ஆக குறைத்து நிர்ண​யிக்​கப்​பட்​டது.

வயது வரம்பு 40 ஆக இருப்​ப​தால் பல ஆண்டுகள் பணி அனுபவம் வாய்ந்த எங்களைப் போன்​றோரால் அந்த தேர்​வுக்கு விண்​ணப்​பிக்க முடி​யாது. இதனால், ஏராளமான கவுரவ விரிவுரை​யாளர்கள் பாதிக்​கப்​படு​வர். அரசு கலை, அறிவியல் கல்லூரி உதவி பேராசிரியர் மற்றும் அரசு பள்ளி ஆசிரியர் பணிக்கான வயது வரம்​பும் முன்புகுறைக்​கப்​பட்​ட​போது அரசுக்கு விடுக்​கப்​பட்ட தொடர் வேண்டு​கோளின்​பேரில் அது முன்பு இருந்து வந்ததைப் போல் 57 ஆக உயர்த்​தப்​பட்​டது.

அதேபோல், அரசு சட்டக் கல்லூரி உதவி பேராசிரியர் தேர்​வுக்கான வயது வரம்பை​யும் உயர்த்த வேண்​டும். இதனால், சட்டக் கல்லூரி மாணவர்கள் பெரிதும் பயன்பெறுவர். இவ்வாறு அவர்கள் கூறினர்.