புதுச்சேரி | பெட்ரோல் ஊற்றி தீ வைக்கப்பட்ட பெண் உயிரிழப்பு

புதுச்சேரி: வாணரப்பேட்டை தமிழ்தாய் நகரைச் சேர்ந்தவர் வேலு. இவரது மனைவி சித்ரா (34). இவர்களுக்கு 2 மகள்கள் உள்ளனர். இந்நிலையில் சித்ராவின் நீண்டகால நண்பரான பாலு என்பவர் கடந்த 24-ம்தேதி அவரது வீட்டுக்கு சென்றார். கணவரை விட்டு தன்னுடன் வருமாறு சித்ராவை அழைத்துள்ளார்.

இதற்கு சித்ரா மறுப்பு தெரிவித்ததால் அவர் மீது பெட்ரோல் ஊற்றி தீ வைத்தார். அப்போது பாலு தப்பித்துவிடாமல் அவரை சித்ரா தடுத்துள்ளார். இதில் இருவரும் தீயில் கருகினர். அக்கம் பக்கத்தினர் இருவரையும் மீட்டு புதுச்சேரி அரசு மருத்துவமனையில் சேர்த்தனர்.

அங்கு பாலு இறந்தார். இதுகுறித்து முதலியார்பேட்டை போலீஸார் வழக்குப் பதிவு செய்தனர். இந்நிலையில் கடந்த ஒரு வாரமாக சிகிச்சை பெற்று வந்த சித்ரா நேற்று முன்தினம் இறந்தார்.