தூத்துக்குடி வியாபாரி உள்ளிட்ட 2 பேரை கடத்தி ரூ. 5 லட்சம் கேட்டு மிரட்டிய 3 பேர் கைது

தூத்துக்குடி: தூத்துக்குடியில் வியாபாரி உள்ளிட்ட இருவரை கடத்திச் சென்று ரூ.5 லட்சம் கேட்டு மிரட்டிய 3 பேரை தனிப்படை போலீஸார் கைது செய்தனர்.

தூத்துக்குடி அருகேயுள்ள மடத்தூர் திரவியரத்னம் நகரைச் சேர்ந்த வியாபாரி குமார் (49) என்பவரை சிலர் கடத்தி சென்று ரூ.5 லட்சம் கேட்டு மிரட்டுவதாக அவரது மனைவி மெல்பா தங்கம் தூத்துக்குடி சிப்காட் காவல் நிலையத்தில் புகார் செய்தார்.

கடத்தப்பட்டவரின் செல்போன் எண் மூலம் போலீஸார் மேற்கொண்ட விசாரணையில் அவர் திருவண்ணாமலையில் இருப்பது தெரியவந்தது. மேலும், குமாருடன் அவரது நண்பரான தேனி மாவட்டம் பெரியகுளத்தைச் சேர்ந்த சேகர் என்பவரும் கடத்தப்பட்டது தெரியவந்தது.

மாவட்டக் காவல் கண்காணிப் பாளர் எல்.பாலாஜி சரவணன் உத்தரவின்பேரில், உதவி காவல் கண்காணிப்பாளர் சந்தீஸ் மேற்பார் வையில், சிப்காட் காவல் ஆய்வாளர் சண்முகம் தலைமையிலான தனிப்படையினர் திருவண்ணாமலை சென்று கடத்தப்பட்டவர்களை மீட்டு தூத்துக்குடிக்கு அழைத்து வந்தனர்.

இருரையும் கடத்தியது தொடர்பாக ஆந்திர மாநிலம் ராஜமுந்திரியைச் சேர்ந்த சதீஷ் (37), சிவகங்கை மாவட்டம் செட்டிக்குறிச்சியைச் சேர்ந்த மணி (33), தெலங்கானா மாநிலம் வெங்கடகிரி பகுதியைச் சேர்ந்த வெங்கடேஷ் (33) ஆகிய மூவரையும் கைது செய்தனர். இதுகுறித்து மாநகர உதவி காவல் கண்காணிப்பாளர் செய்தியாளர்களிடம் கூறியதாவது:

கடத்தப்பட்ட குமாரும், சேகரும் கடந்த 3 மாதங்களுக்கு முன் திருவண்ணாமலை சென்றபோது தங்களிடம் வேதிப் பொருள் கலந்த விலை உயர்ந்த டார்ச்பீச் எனும் மாந்திரீக பொருள் இருப்பதாக கூறி சதீஷ், மணி, வெங்கடேஷ் ஆகியோரிடம் அறிமுகமாகியுள்ளனர். மூவரிடம் இருந்தும் ரூ. 48,000 பெற்றுக் கொண்டு குமாரும், சேகரும் ஊர் திரும்பியுள்ளனர்.

இதனால் ஏமாற்றம் அடைந்த மூவரும் சேர்ந்து குமார், சேகர் இருவரையும் கடத்திச் சென்று தங்களிடம் தருவதாகச் சொன்ன பொருளை தரவில்லை என்றால் உங்களை விட மாட்டோம் என்று கூறியதுடன், குமாரின் மனைவியிடம் ரூ. 5 லட்சம் கேட்டு மிரட்டியும் உள்ளனர். கைதான மூவரிடம் தொடர்ந்து விசாரணை மேற்கொள்ளப்பட்டு வருகிறது என்றார்.

கடத்தப்பட்ட குமாரும், சேகரும் கடந்த 3 மாதங்களுக்கு முன் திருவண்ணாமலை சென்றபோது தங்களிடம் வேதிப் பொருள் கலந்த விலை உயர்ந்த டார்ச்பீச் எனும் மாந்திரீக பொருள் இருப்பதாக கூறி அறிமுகமாகியுள்ளனர்.