விபத்தில் கவிழ்ந்த காஸ் டேங்கர் லாரியை மீட்க 11 மணிநேர போராட்டம்: கோவையில் நடந்தது என்ன?

கோவை: கோவை அவிநாசி சாலை பழைய மேம்​பாலத்​தில், காஸ் டேங்கர் லாரி, நேற்று அதிகாலை கவிழ்ந்து விபத்துக்குள்ளானது.

கவிழ்ந்த டேங்​கரில் இருந்து எரிவாயு வெளி​யேறிய நிலை​யில் முன்னெச்​சரிக்கை நடவடிக்கை​யாக, சம்பவ இடத்​துக்கு அருகாமை​யில் இருந்த 37 பள்ளி​களுக்கு விடு​முறை விடப்​பட்​டது.

கேரள மாநிலம் கொச்​சி​யில் இருந்து 18 மெட்​ரிக் டன் எல்.பி.ஜி. சமையல் எரிவா​யுவை ஏற்றிய டேங்கர் லாரி, கோவை பீளமேட்​டிலுள்ள காஸ் குடோன் நோக்கி நேற்று முன்​தினம் புறப்​பட்டு வந்தது. லாரியை தென்​காசியை சேர்ந்த ஓட்டுநர் ராதாகிருஷ்ணன் (30) ஓட்டி​னார்.

கோவை அவிநாசி சாலை பழைய மேம்​பாலத்தை கடந்து உப்பிலிபாளையம் வழித்​தடத்​தில் திரும்​பிய​போது, டேங்கர் லாரி​யின் ஆக்சில் இணைப்பு துண்​டிக்​கப்​பட்​டது. இதனால், லாரி​யில் இருந்து டேங்கர் தனியாக பிரிந்து கவிழ்ந்​தது. லாரி​யும் மறுபுற சுவரில் மோதிய நிலை​யில் டேங்கர் பின்னோக்கி அங்குள்ள தடுப்புச் சுவரில் மோதி​யது. இதனால், டேங்​கரின் ‘பிரஷர் மீட்​டர்’ உடைந்து, அதன் வழியாக எரிவாயு வெளியேற தொடங்​கியது.

தகவலறிந்த மாநகர காவல் துறை​யினர், தீயணைப்புத் துறை​யினர், எரிவாயு நிறுவன அதிகாரிகள் சம்பவ இடத்​துக்கு வந்து மீட்​புப் பணிகளில் ஈடுபட்​டனர். வெளி​யேறிக் கொண்​டிருந்த காஸ் மூலம் தீப்​பிடித்து விடக்​கூடாது என்ப​தற்காக டேங்கர் மீது தீயணைப்புத் துறை​யினர் தண்ணீரை பீய்ச்​சி​யடித்​தனர். மேம்​பாலத்தை சுற்றி​லும் ஒரு கிலோ மீட்டர் தூரத்​துக்​குட்​பட்ட இடங்​களில் மின் இணைப்பு துண்​டிக்​கப்​பட்​டது. சுமார் 2 கிலோ மீட்டர் சுற்​றளவுக்​கு உட்​பட்ட இடங்​களில் உள்ள 37 பள்ளி​களுக்கு விடு​முறை அளிக்​கப்​பட்​டது.

மேம்​பாலத்​துக்கு வரும் அனைத்து வழித்​தடங்​களும் 1 கிலோ மீட்டர் தூரத்​துக்கு முன்ன​தாகவே அடைக்​கப்​பட்​டன. திருச்​சி​யிலுள்ள எரிவாயு நிறுவன மீட்​பு குழு​வினருக்கு தகவல் தெரிவிக்​கப்​பட்​டது. தொடர்ந்து பிபிசிஎல் நிறுவன அதிகாரிகள் சத்யநாராயணன், சங்கர், பாது​காப்பு அலுவலர் சிவக்​கு​மார், எண்ணெய் நிறு​வனங்​களின் தொழில்​நுட்ப ஒப்பந்​த​தாரர் ராபர்ட் ஆகியோர் டேங்​கரில் ஏற்பட்ட கசிவை தடுத்து நிறுத்​தும் பணியில் ஈடுபட்​டனர்.

சில மணி நேர போராட்​டத்​துக்கு பிறகு, வேதி​யியல் கலவை, சிலி​கான் பேஸ்ட் உள்ளிட்​ட​வற்றை ஒட்டி தற்காலிகமாக கசிவை தடுத்து நிறுத்​தினர். இதையடுத்து முதல்​கட்​டமாக ரோப்பை கட்டி டேங்கரை தூக்கி நிறுத்த அதிகாரிகள் முடிவு செய்து அதற்கான நடவடிக்கைகள் தொடங்​கப்​பட்டன. தீயணைப்புத் துறை​யினர் தண்ணீரை பீய்ச்​சி​அடிக்க தயார் நிலை​யில் நிறுத்​தப் ​பட்​டனர். தொடர்ந்து கிரேன்களை பயன்​படுத்தி கீழே விழுந்த டேங்​கர், 8 மணி நேர போராட்​டத்​துக்கு பின்னர் 11 மணியள​வில் தூக்கி நிறுத்​தப்​பட்​டது.

மாற்று லாரி அங்கு வரவழைக்​கப்​பட்டு, அதனுடன் டேங்கர் இணைக்​கப்​பட்டு 11 மணி நேர போராட்​டத்​துக்கு பின்னர், விபத்து நடந்த இடத்​தில் இருந்து டேங்கர் லாரி புறப்​பட்​டது. 4 தீயணைப்பு வாகனங்​கள், போலீஸ் ஜீப் பாது​காப்புடன் லாரி பீளமேட்​டில் உள்ள குடோனுக்கு நேற்று மதியம் 2.30 மணிக்கு கொண்டு செல்​லப்​பட்​டது. இவ்விபத்து தொடர்​பாக, ஓட்டுநர் ராதாகிருஷ்ணன் மீது போக்கு​வரத்து புலனாய்வு பிரிவு போலீ​ஸார் வழக்​கு பதிந்​துள்ளனர்.