ஆயுள் சிறைக் கைதி சித்ரவதை விவகாரம்: சிறைக் காவலர்கள் மேலும் 11 பேர் பணியிடை நீக்கம்

சென்னை: ஆயுள் சிறைக் கைதி சித்ரவதை செய்யப்பட்ட விவகாரத்தில் சிறைத் துறை பெண் டிஐஜி உட்பட 3 பேர் பணியிடை நீக்கம் செய்யப்பட்டிருந்த நிலையில், இந்த வழக்கில் தொடர்புடைய மேலும் 11 பேரை பணியிடை நீக்கம் செய்து சிறைத் துறை கூடுதல் டிஜிபி-யான மகேஷ்வர் தயாள் உத்தரவிட்டுள்ளார்.

கிருஷ்ணகிரி மாவட்டம் மாணிக்கம் கோட்டை பகுதியைச் சேர்ந்தவர் சிவக்குமார் (30). இவர் கொலை வழக்கில் ஆயுள் தண்டனை விதிக்கப்பட்டு வேலூர் மத்திய சிறையில் அடைக்கப்பட்டிருந்தார். இந்நிலையில், கடந்த சில மாதங்களுக்கு முன்பு வேலூர் சரக சிறைத்துறை டிஐஜி-யான ராஜலட்சுமி வீட்டில் வீட்டு வேலைகளை செய்வதற்காக வேலூர் மத்திய சிறையில் இருந்து சிவக்குமாரை, சிறைத்துறை வார்டன்கள் அழைத்துச் சென்றுள்ளனர்.

அப்போது அவர், வீட்டில் இருந்த ரூ.4.25 லட்சம் பணம் மற்றும் வெள்ளி பொருட்களை திருடியதாக கூறி சிறை வார்டன்கள், காவலர்கள் சிறையில் தனி அறையில் அடைத்து சிவக்குமாரை சித்ரவதை செய்ததாக குற்றச்சாட்டு எழுந்தது. இதுதொடர்பாக சிவக்குமாரின் தாயார் கலாவதி சென்னை உயர் நீதிமன்றத்தில் மனு தாக்கல் செய்தார். அதனை விசாரித்த நீதிபதிகள் இது தொடர்பாக சிபிசிஐடி விசாரணைக்கு உத்தரவிட்டனர்.

அதன்பேரில் சிபிசிஐடி போலீஸார் வேலூர் சரக சிறைத் துறை டிஐஜி-யான ராஜலட்சுமி, வேலூர் மத்திய சிறை கூடுதல் கண்காணிப்பாளர் (ஏடிஎஸ்பி) அப்துல் ரகுமான், ஜெயிலர் அருள்குமரன் உள்பட 14 பேர் மீது 5 பிரிவுகளின் கீழ் வழக்கு பதிந்து விசாரணை நடத்தினர். இதில், ஆயுள் தண்டனை கைதி சிவக்குமார் தாக்கப்பட்டது உறுதி செய்யப்பட்டதால், அவர் சேலம் மத்திய சிறைக்கு மாற்றப்பட்டார்.

இதற்கிடையே, வேலூர் சரக டிஐஜி-யான ராஜலட்சுமி காத்திருப்போர் பட்டியலுக்கும், சிறை கண்காணிப்பாளர் அப்துல் ரகுமான் சென்னை புழல்-2 சிறைக்கும் மாற்றப்பட்டனர். ஆனாலும், இந்த வழக்கு உயர் நீதிமன்றத்தில் மீண்டும் விசாரணைக்கு வந்தபோது, இந்த வழக்கில் உயர் அதிகாரிகள் மீது நடவடிக்கை எடுக்காதது ஏன் என்று நீதிபதிகள் கடுமையாக கேள்வி எழுப்பினர்.

இதன் தொடர்ச்சியாக, டிஐஜி-யான ராஜலட்சுமி, ஏடிஎஸ்பி-யான அப்துல் ரகுமான், ஜெயிலர் அருள்குமரன் ஆகிய 3 சிறைத்துறை அதிகாரிகள் அண்மையில் பணியிடை நீக்கம் செய்யப்பட்டனர். இந்நிலையில், ஆயுள் சிறை கைதி தாக்கப்பட்ட விவகாரத்தில் டிஐஜி-யின் மெய்க்காவலர்கள் ராஜூ, சிறப்புப் படை காவலர்கள் ரஷீத், மணி, பிரசாந்த், ராஜா, தமிழ்செல்வன், விஜி, பெண் காவலர்கள் சரஸ்வதி, செல்வி, வார்டர்கள் சுரேஷ், சேது ஆகிய மேலும் 11 சிறைத் துறையினரை பணியிடை நீக்கம் செய்து சிறைத் துறை கூடுதல் டிஜிபி-யான மகேஷ்வர் தயாள் உத்தரவிட்டுள்ளதாக சிறைத் துறை அதிகாரிகள் தெரிவித்தனர்.