மதுரை | ஆட்டோவிலிருந்து பெண்ணை கீழே தள்ளி நகை பறிப்பு

மதுரை: மதுரையில் ஆட்டோவிலிருந்து பெண்ணை கீழே தள்ளிவிட்டு நகையை பறித்துச் சென்ற மர்ம நபர்களை போலீஸார் தேடி வருகின்றனர்.

தென்காசி மாவட்டம், புளியங்குடியைச் சேர்ந்த இப்ராகிம் மகள் ரபீனா (24). மதுரை மாட்டுத்தாவணி பகுதியிலுள்ள ஐடி நிறுவனத்தில் பணிபுரிகிறார். இவர் நேற்று முன்தினம் மாலை பணி முடிந்து, மேலூர் பைபாஸ் சாலையில் ஆட்டோவில் ஏறிச் சென்றார். வழியில் 2 ஆண்கள் ஆட்டோவில் ஏறினர்.

சிறிது தூரம் சென்ற நிலையில், அவர்கள் ரபீனா அணிந்திருந்த 3 பவுன் நகையை பறித்தனர். பின்னர் அவரை கீழே தள்ளி விட்டு தப்பிச் சென்றனர். காயமடைந்த ரபீனா, மாட்டுத் தாவணி போலீஸில் புகார் அளித்தார். அதன் பேரில், போலீஸார் அப்பகுதியிலுள்ள சிசிடிவி கேமரா பதிவுகளை ஆய்வு செய்து, சம்பந்தப்பட்ட ஆட்டோ பதிவெண்ணை கண்டறிந்து விசாரணை நடத்தி வருகின்றனர்.

வீட்டில் திருட்டு: மதுரை கீரைத்துறை மேலத்தோப்பு பகுதியைச் சேர்ந்த கணேசன் மனைவி கவிதா (43). இவர் கடந்த 1-ம் தேதி வீட்டை பூட்டிவிட்டு, வெளியூர் சென்றிருந்தார். 5-ம் தேதி வீடு திரும்பியபோது, கதவு உடைக்கப்பட்டு பீரோவில் இருந்த 6 பவுன் நகை திருடுபோனது தெரியவந்தது. இது தொடர்பாக கீரைத்துறை போலீஸார் விசாரிக்கின்றனர்.