மணிரத்னம் இயக்கத்தில் விஜய் தேவரகொண்டா?

தற்போது மணிரத்னம் இயக்கவுள்ள புதிய படத்தில் விஜய் தேவரகொண்டா நடிக்கவுள்ளதாக வெளியான தகவலுக்கு படக்குழு மறுப்பு தெரிவித்துள்ளது.

மணிரத்னம் இயக்கத்தில் உருவாகவுள்ள படத்தின் படப்பிடிப்பு ஜனவரி 2018-ல் துவங்கவுள்ளார்கள். அரவிந்த்சாமி, சிம்பு, விஜய் சேதுபதி, ஃபகத் பாசில், ஜோதிகா, ஐஸ்வர்யா ராஜேஷ் ஆகியோர் நடிக்கவுள்ள இப்படத்தின் முதற்கட்ட பணிகள் நடைபெற்று வருகிறது.

இதனிடையே இப்படத்தில் 'அர்ஜுன் ரெட்டி' பட நாயகன் விஜய் தேவரகொண்டா நடிக்கவிருப்பதாக தகவல்கள் வெளியானது. இது தொடர்பாக விசாரித்த போது, "'அர்ஜுன் ரெட்டி' படத்தில் விஜய் தேவரகொண்டாவின் நடிப்பு மணிரத்னத்திற்கு வெகுவாக பிடித்திருந்தது உண்மை தான்.

அவரோடு ஒரு படத்தில் பணிபுரிய வேண்டும் என்ற ஆசை மணிரத்னத்திற்கு உள்ளது. ஆனால், அது விரைவில் தொடங்கவுள்ள புதிய படத்தில் இல்லை. இருவரும் இணையும் படம் உருவாக வாய்ப்பு இருக்கிறது. ஆனால், எப்போது என்பது இன்னும் முடிவாகவில்லை" என்று தெரிவித்தனர்.

மணிரத்னம் இயக்கவுள்ள படத்துக்கு ஏ.ஆர்.ரஹ்மான் இசையமைப்பாளராகவும், சந்தோஷ் சிவன் ஒளிப்பதிவாளராகவும் ஒப்பந்தம் செய்யப்பட்டு இருக்கிறார்கள். மெட்ராஸ் டாக்கீஸ் நிறுவனம் இப்படத்தை பெரும் பொருட்செலவில் தயாரிக்கவிருப்பது குறிப்பிடத்தக்கது.