சூப்பர் டீலக்ஸ் அப்டேட்: பூசாரியாக நடித்திருக்கும் மிஷ்கின்

தியாகராஜன் குமாரராஜா இயக்கி வரும் 'சூப்பர் டீலக்ஸ்' படத்தில் பூசாரியாக நடித்திருக்கிறார் இயக்குநர் மிஷ்கின்.

பணமதிப்பு நீக்கம், பெப்சி தொழிலாளர்கள் பிரச்சினை உள்ளிட்டவை முடிவுக்கு வந்தப் பிறகு 'சூப்பர் டீலக்ஸ்' படத்தின் பணிகள் தீவிரப்படுத்தப்பட்டுள்ளது. இதில் ஷில்பா என்ற திருநங்கையாக நடித்துள்ள விஜய் சேதுபதியின் லுக்கை வெளியிட்டார் தியாகராஜன் குமாரராஜா. இதற்கு சமூக வலைதளத்தில் பெரும் வரவேற்பு கிடைத்தது.

இப்படத்தின் திரைக்கதையை தியாகராஜன் குமாரராஜாவோடு இணைந்து மிஷ்கின், நீலன் சேகர் மற்றும் நலன் குமாரசாமி ஆகியோர் எழுதியுள்ளார்கள். தற்போது விஜய் சேதுபதியின் காட்சிகளை படமாக்கி வருகிறார்கள்.

இதில் திரைக்கதையில் பங்களித்தது மட்டுமன்றி, முக்கியமான பூசாரி கதாபாத்திரத்திலும் நடித்திருக்கிறார் மிஷ்கின். விஜய்சேதிபதி, ஃபகத் பாசில், சமந்தா உள்ளிட்ட பலர் நடித்திருக்கும் இப்படத்துக்குப் பெரும் எதிர்பார்ப்பு உருவாகியுள்ளது.

பி.எஸ்.வினோத் மற்றும் நீரவ்ஷா இருவரும் ஒளிப்பதிவாளராக பணிபுரிந்து வருகிறார்கள்.