செப். 21-ம் தேதி வெளியாகிறது மெர்சல் டீஸர்

அட்லீ இயக்கத்தில் விஜய் நடித்திருக்கும் 'மெர்சல்' படத்தின் டீஸர், செப்டம்பர் 21-ம் தேதி மாலை 6 மணிக்கு வெளியாகும் என படக்குழு அறிவித்துள்ளது.

'மெர்சல்' படத்தின் டீஸருக்கு ஏ.ஆர்.ரஹ்மானின் பின்னணி இசை மற்றும் தணிக்கைப் பணிகள் முடிக்கப்பட்டு இருக்கிறது. அதனைத் தொடர்ந்து டீஸர் எப்போது வெளியீடு என்பதை தேனாண்டாள் பிலிம்ஸ் ஹேமா ருக்மணி தனது ட்விட்டர் பக்கத்தில் இன்று (செப்டம்பர் 16) மாலை 6 மணிக்கு அறிவிப்பார் என்று படக்குழு தெரிவித்தது.

அதன்படி, "செப்டம்பர் 21-ம் தேதி மாலை 6 மணிக்கு 'மெர்சல்' டீஸர் வெளியீடு" என்று ஹேமா ருக்மணி அறிவித்துள்ளார். இதன் மூலம், பெரும் எதிர்பார்ப்பில் இருக்கும் 'மெர்சல்' படத்தின் விளம்பரப்படுத்தும் பணிகளை படக்குழு துவங்கியுள்ளது.

135 கோடி பொருட்செலவில் தேனாண்டாள் பிலிம்ஸ் நிறுவனம் பிரம்மாண்டமாக தயாரித்திருக்கிறது. அட்லீ இயக்கத்தில் விஜய், சமந்தா, காஜல் அகர்வால், நித்யாமேனன், வடிவேலு, சத்யராஜ், எஸ்.ஜே.சூர்யா, யோகிபாபு உள்ளிட்ட பலர் நடித்திருக்கிறார்கள்.

விஜய்யின் முந்தைய படங்களை விட அதிகப் பொருட்செலவில் உருவாகியுள்ளதால், இதற்கு விநியோகஸ்தர்கள் மத்தியில் பெரும் எதிர்பார்ப்பு உருவாகியுள்ளது. ஆனால், தேனாண்டாள் பிலிம்ஸ் நிறுவனம் தமிழகமெங்கும் சொந்தமாகவே வெளியிட முடிவு செய்துள்ளது.