‘பகாசூரன்’ கொண்டாட்டம்: ரூ.5 லட்சம் மதிப்பிலான வாட்சை மோகன்.ஜி-க்கு பரிசளித்த தயாரிப்பாளர்

‘பகாசூரன்’ படத்தின் வெற்றிக் கொண்டாட்டத்தின் ஒரு பகுதியாக ரூ.5 லட்சம் மதிப்புள்ள வாட்சை தயாரிப்பாளர் கௌதம், இயக்குநர் மோகன்.ஜி-க்கு பரிசாக வழங்கியுள்ளார்.

‘பழைய வண்ணாரப்பேட்டை’, ‘திரௌபதி’, ‘ருத்ர தாண்டவம்’ படங்களைத் தொடர்ந்து இயக்குநர் மோகன்.ஜி இயக்கியுள்ள படம் ‘பகாசூரன்’. கடந்த பிப்ரவரி 17-ம் தேதி திரையரங்குகளில் வெளியான இப்படத்தில் செல்வராகவன், நட்டி நட்ராஜ் ஆகியோர் முதன்மை கதாபாத்திரங்களில் நடித்திருந்தனர். படத்திற்கு சாம்.சி.எஸ் இசையமைத்திருந்தார். திரையரங்குகளில் ஓடிக்கொண்டிருக்கும் படம் கலவையான விமர்சனங்களைப் பெற்று வருகிறது.

இந்நிலையில், படத்தின் வெற்றிக் கொண்டாட்டத்தின் ஒரு பகுதியாக ‘பகாசூரன்’ படத்தை தமிழகம் முழுவதும் வெளியிட்ட தயாரிப்பாளர் கௌதம், இயக்குநர் மோகன்.ஜி-க்கு ரூ.5 லட்சம் மதிப்புள்ள வாட்சை பரிசாக வழங்கினார். அத்துடன், கேக் வெட்டி வெற்றியை கொண்டாடிய படக்குழுவுடன் நடிகர் ரிச்சர்ட்டும் கலந்துகொண்டார். ரூ.7 கோடிக்கும் குறைவான பட்ஜெட்டில் உருவான இப்படம் ரூ.5 கோடியைத் தாண்டி வசூலித்து வருவதாக தகவல் வெளியாகியுள்ளது.