ஏ.எம்.ஆர். ரமேஷ் இயக்கும் புதிய படத்தில் அர்ஜூனும், ஷாமும் இணைந்து நடிக்கின்றனர். இத்திரைப்படத்துக்கு 'ஒரு மெல்லிய கோடு' என்று டைட்டில் வைக்கப்பட்டுள்ளது.
'குப்பி', 'வனயுத்தம்' ஆகிய படங்களை இயக்கிய ஏ.எம்.ஆர், ரமேஷ் தன் அடுத்த படத்துக்கு 'ஒரு மெல்லிய கோடு' என்று டைட்டில் வைத்திருக்கிறார். அக்ஷயா கிரியேஷன்ஸ் நிறுவனம் இப்படத்தைத் தயாரிக்கிறது.
இதில் அர்ஜுன் நாயகனாக நடிக்கிறார். முக்கிய வேடம் ஒன்றில் ஷாம் நடிக்கிறார். கதாநாயகியாக அக்ஷாபட் நடிக்கிறார். மனிஷாகொய்ராலா , ரவிகாளே, ஜீன், அருள்மணி ஆகியோர் முக்கியக் கதாபாத்திரங்களில் நடிக்கிறார்கள்.
இளையராஜா இப்படத்துக்கு இசையமைக்கிறார். சேதுஸ்ரீராம் ஒளிப்பதிவு செய்கிறார்.
தற்போது பூந்தமல்லியில் தடயவியல் ஆய்வுக்கூடம் அமைக்கப்பட்டு படப்பிடிப்பு நடைபெற்று வருகிறது. அதில் அர்ஜுன் , ஷாம் , மனிஷா கொய்ராலா ஆகியோர் நடித்துவருகின்றனர்.
''இது என் சினிமா கேரியரில் புதுசு.இன்னும் இருபது ஆண்டுகள் கழித்து அசை போட்டுக் கொள்ள இது போன்று ஒரு படத்தில் நடித்தோமே என்று பெருமைப்பட்டுக் கொள்ளும் படியான கதாபாத்திரம்'' என்று பெருமையாக கூறுகிறார் அர்ஜூன்.