மோகன் ராஜா - சிவகார்த்திகேயன் இணையும் வேலைக்காரன்

மோகன் ராஜா இயக்கத்தில் சிவகார்த்திகேயன் நடித்து வரும் படத்துக்கு 'வேலைக்காரன்' என தலைப்பிட்டு இருக்கிறார்கள்.

'ரெமோ' படத்தைத் தொடர்ந்து 24 ஏ.எம். நிறுவனம் தயாரிக்கும் அடுத்த படத்திலும் நாயகனாக நடித்து வருகிறார் சிவகார்த்திகேயன். மோகன் ராஜா இயக்கி வருகிறார்.

நயன்தாரா, பஹத் பாசில், ஆர்.ஜே.பாலாஜி, பிரகாஷ்ராஜ், சினேகா, ரோகிணி, தம்பி ராமையா உள்ளிட்ட பலர் இப்படத்தில் முக்கிய கதாபாத்திரங்களில் நடித்து வருகிறார்கள். அனிருத் இசையமைப்பாளராக பணியாற்றி வருகிறார்.

நவம்பர் 11ம் தேதி படப்பிடிப்பு தொடங்கப்பட்டு தொடர்ச்சியாக நடைபெற்று வருகிறது. சாலிகிராமத்தில் குடிசைப்பகுதி கொண்ட பிரம்மாண்ட அரங்குகள் அமைக்கப்பட்டு சுமார் 45 நாட்கள் அங்கு முக்கியமான காட்சிகளை காட்சிப்படுத்தி வருகிறது படக்குழு.

சிவகார்த்திகேயன் பிறந்த நாளை முன்னிட்டு, இப்படத்தின் தலைப்பு அறிவிக்கப்படும் என படக்குழு தெரிவித்திருந்தது. அதன்படி 'வேலைக்காரன்' என தனது ட்விட்டர் பக்கத்தில் அறிவித்துள்ளார் இயக்குநர் மோகன் ராஜா.

படப்பிடிப்பு தொடங்கப்பட்ட நாளிலேயே, இப்படம் 2017ம் ஆண்டு விநாயகர் சதுர்த்தி அன்று வெளியாகும் என படக்குழு அதிகாரப்பூர்வமாக அறிவித்துள்ளது.