சூர்யா நடிப்பில் செல்வராகவன் இயக்கும் படத்தின் தலைப்பு ‘என்.ஜி.கே’

சூர்யா நடிப்பில் செல்வராகவன் இயக்கிவரும் படத்திற்கு ‘என்.ஜி.கே’ என்று தலைப்பு வைக்கப்பட்டுள்ளது.

சூர்யா நடிப்பில் செல்வராகவன் ஒரு படத்தை இயக்கி வருகிறார். ரகுல் ப்ரீத்சிங் மற்றும் சாய் பல்லவி என இரண்டு ஹீரோயின்கள் இப்படத்தில் நடிக்கின்றனர். பிரபல தெலுங்கு நடிகர் ஜெகபதி பாபு வில்லனாக நடிக்கிறார். ட்ரீம் வாரியர் பிக்சர்ஸ் சார்பில் எஸ்.ஆர்.பிரகாஷ் பாபு, எஸ்.ஆர்.பிரபு இருவரும் இணைந்து இந்தப் படத்தைத் தயாரிக்கின்றனர். அரவிந்த் கிருஷ்ணா ஒளிப்பதிவு செய்ய, ஜி.கே.பிரசன்னா எடிட் செய்கிறார்.

இந்தப் படத்துக்கு யுவன் ஷங்கர் ராஜா இசையமைக்கிறார். ‘நெஞ்சம் மறப்பதில்லை’ படத்தைத் தொடர்ந்து செல்வராகவன் - யுவன் ஷங்கர் கூட்டணியில் உருவாகும் படம் இது. அதற்கு முன்னர், தனுஷ், சினேகா, சோனியா அகர்வால் நடிப்பில் 2006 ஆம் ஆண்டு வெளியான 'புதுப்பேட்டை' படம்தான் செல்வராகவன் - யுவன்ஷங்கர் ராஜா  கூட்டணியில் ரிலீஸான கடைசிப் படம்.

சூர்யாவின் 36-வது படமான இதற்கு ‘என்.ஜி.கே’ என்று தலைப்பு வைக்கப்பட்டுள்ளது. தமிழ் மற்றும் தெலுங்கில் உருவாகிவரும் இந்தப் படம், தீபாவளிக்கு ரிலீஸாகும் என அறிவிக்கப்பட்டுள்ளது. இதை, ரிலையன்ஸ் எண்டெர்டெயின்மெண்ட் நிறுவனம் வெளியிடுகிறது.