கார்த்தி - பாக்யராஜ் கண்ணன் படத்தின் தலைப்பு ‘சுல்தான்’?

பாக்யராஜ் கண்ணன் இயக்கத்தில் கார்த்தி நடிக்கும் படத்துக்கு ‘சுல்தான்’ எனத் தலைப்பு வைக்கப்பட்டுள்ளதாகத் தகவல் வெளியாகியுள்ளது.

சிவகார்த்திகேயன் நடிப்பில் வெளியான ‘ரெமோ’ படத்தின் மூலம் இயக்குநராக அறிமுகமானவர் பாக்யராஜ் கண்ணன். 2016-ம் ஆண்டு வெளியான இந்தப் படத்தில், கீர்த்தி சுரேஷ் ஹீரோயினாக நடித்தார். அனிருத் இசையில் வெளியான இந்தப் படத்துக்கு ரசிகர்களிடையே வரவேற்பு கிடைத்தது.

‘ரெமோ’ படத்தைத் தொடர்ந்து கார்த்தி நடிப்பில் ஒரு படத்தை இயக்க ஒப்பந்தமானார் பாக்யராஜ் கண்ணன். இந்தப் படத்தை ட்ரீம் வாரியர் பிக்சர்ஸ் சார்பில் எஸ்.ஆர்.பிரகாஷ் பாபு, எஸ்.ஆர்.பிரபு தயாரிக்கின்றனர். இதில், கார்த்தி ஜோடியாக தெலுங்கு நடிகை ராஷ்மிகா மண்டன்னா நடிக்கிறார். இவர் நடிக்கும் முதல் தெலுங்குப்படம் இது.

விவேக் - மெர்வின் இசையமைக்கும் இந்தப் படத்துக்கு, சத்யன் சூரியன் ஒளிப்பதிவு செய்கிறார். கலை இயக்குநராக ஜெய், சண்டைப் பயிற்சியாளராக திலீப் சுப்பராயன், எடிட்டராக ரூபன், ஆடை வடிவமைப்பாளராக உத்ரா மேனன் ஆகியோர் ஒப்பந்தம் செய்யப்பட்டுள்ளனர்.

இதன் படப்பிடிப்பு, கடந்த மார்ச் 13-ம் தேதி பூஜையுடன் தொடங்கியது. ஆனால், திடீரென ஜீத்து ஜோசப் இயக்கும் படத்துக்குத் தேதிகள் கொடுத்து, தற்போது அதில் நடித்துவருகிறார் கார்த்தி. இதில், கார்த்தி அக்காவாக ஜோதிகா நடிக்க, அப்பாவாக சத்யராஜ் நடிக்கிறார்.

ஜீத்து ஜோசப் இயக்கிவரும் படத்தின் படப்பிடிப்பு, தற்போது ஊட்டியில் நடைபெற்று வருகிறது. கார்த்தி ஜோடியாக நிகிலா விமல் நடிக்கும் இதன் படப்பிடிப்பு முடிந்த பிறகே, பாக்யராஜ் கண்ணன் இயக்கத்தில் நடிக்கப் போகிறார் கார்த்தி.

இந்நிலையில், பாக்யராஜ் கண்ணன் இயக்கத்தில் கார்த்தி நடிக்கும் படத்துக்கு ‘சுல்தான்’ எனத் தலைப்பு வைக்கப்பட்டுள்ளதாகத் தகவல் வெளியாகியுள்ளது. இதுகுறித்து தயாரிப்பாளர் எஸ்.ஆர்.பிரபுவிடம் கேட்டபோது, “பல தலைப்புகள் பரிசீலனையில் உள்ளன. இன்னும் தலைப்பை முடிவு செய்யவில்லை” என்றார்.

விரைவில் இதுகுறித்த அதிகாரபூர்வ அறிவிப்பு வெளியாகும் எனத் தெரிகிறது.