நித்திலன் இயக்கத்தில் நயன்தாரா நடிக்கவுள்ள படத்துக்கு ‘மகாராணி’ எனத் தலைப்பிட்டு இருக்கிறார்கள். நித்திலன் இயக்கத்தில் விஜய் சேதுபதி, அனுராக் கஷ்யாப், நட்டி, மம்தா மோகன்தாஸ், சிங்கம் புலி உள்ளிட்ட பலர் நடிப்பில் வெளியான படம் ‘மகாராஜா’. பேஷன் ஸ்டூடியோஸ் மற்றும் தி ரூட் ஆகிய நிறுவனங்கள் இணைந்து தயாரித்த இந்தப் படம் மாபெரும் வரவேற்பினை பெற்றது. ஓடிடி தளம் வெளியீட்டிலும் கொண்டாடப்பட்டு வருகிறது.
இந்தப் படத்தினை பார்த்துவிட்டு பல்வேறு திரையுலக பிரபலங்கள் இயக்குநர் நித்திலனை அழைத்து பாராட்டினார்கள். ‘மகாராஜா’ படம் வெளியாகும் முன்பே நயன்தாரா நடிக்கவுள்ள படத்தினை இயக்க ஒப்பந்த மாகிவிட்டார் நித்திலன். இதனையும் பேஷன் ஸ்டூடியோஸ் நிறுவனமே தயாரிக்கவுள்ளது.
இந்தப் படம் குறித்த அதிகாரபூர்வ அறிவிப்பு விரைவில் வெளியாகும் என எதிர்பார்க்கப்படுகிறது. தற்போது இதற்கு ‘மகாராணி’ என பெயரிட படக்குழு முடிவு செய்திருக்கிறது. ‘மகாராஜா’ படத்தின் பிரம்மாண்ட வெற்றியால் இந்தப் பெயரா அல்லது கதைக்காகவா என்பது விரைவில் தெரியவரும்.