சென்னையைத் தொடர்ந்து வெளிநாட்டு படப்பிடிப்பு: விஜய்62 படக்குழு முடிவு

சென்னை படப்பிடிப்பைத் தொடர்ந்து, வெளிநாட்டில் படப்பிடிப்பைத் தொடங்க 'விஜய் 62' படக்குழு முடிவு செய்திருக்கிறது.

ஏ.ஆர்.முருகதாஸ் இயக்கத்தில் விஜய் நடிக்கும் படத்தின் முதற்கட்ட படப்பிடிப்பு சென்னையில் படப்பூஜையுடன் தொடங்கப்பட்டது. கொல்கத்தாவில் 2-ம் கட்ட படப்பிடிப்பை முடித்து, மீண்டும் சென்னையில் உள்ள கல்லூரிகளில் சில காட்சிகளை படமாக்கி வருகிறது படக்குழு.

இதனைத் தொடர்ந்து அமெரிக்காவில் ஒரு பாடல் மற்றும் சில முக்கியமான காட்சிகளை படமாக்க முடிவு செய்திருக்கிறார்கள். இதற்காக விரைவில் அமெரிக்காவுக்கு செல்ல திட்டமிட்டு இருக்கிறார்கள்.

கீர்த்தி சுரேஷ் நாயகியாக நடித்து வரும் இப்படத்துக்கு ஏ.ஆர்.ரஹ்மான் இசையமைத்து வருகிறார். ஒளிப்பதிவாளராக க்ரிஷ் கங்காதரனும் எடிட்டராக ஸ்ரீகர் பிரசாத்தும் பணிபுரிந்து வருகிறார்கள். சன் பிக்சர்ஸ் பெரும் பொருட்செலவில் தயாரித்து வரும் இப்படம் தீபாவளி வெளியீடாக திரைக்கு வரவுள்ளது