ஏப்ரல் 27-ம் தேதி வெளியாகிறது Mr. சந்திரமெளலி

திரு இயக்கத்தில் உருவாகி வரும் ‘Mr. சந்திரமெளலி’ திரைப்படம் ஏப்ரல் 27-ம் தேதி வெளியாகும் என படக்குழு அதிகாரப்பூர்வமாக அறிவித்திருக்கிறது.

திரு இயக்கத்தில் கார்த்திக், கவுதம் கார்த்திக், ரெஜினா, வரலெட்சுமி சரத்குமார், சதீஷ், இயக்குநர் மகேந்திரன், இயக்குநர் அகத்தியன் உள்ளிட்ட பலர் நடிக்க தொடங்கப்பட்ட படம் ‘Mr. சந்திரமெளலி’. சென்னையைச் சுற்றியுள்ள பகுதிகளில் இப்படத்தின் படப்பிடிப்பு தொடர்ந்து நடைபெற்று வந்தது.

தற்போது இறுதிகட்ட படப்பிடிப்பில் தீவிரம் காட்டி வருகிறார்கள். ஒவ்வொரு நாள் படப்பிடிப்பு முடிவடைந்தவுடன், இரவே எடிட்டிங் என சரியாக திட்டமிட்டு பணிபுரிந்து வருகிறார்கள். இதனால், ஏப்ரல் 27-ம் தேதி வெளியீடு என்று படக்குழு தங்களுடைய வெளியீட்டை அதிகாரப்பூர்வமாக அறிவித்திருக்கிறார்கள். கவுதம் கார்த்திக் தன் தந்தையுடன் நடிக்கும் முதல் படம் இது.

ஒளிப்பதிவாளராக ரிச்சர்ட் எம்.நாதன், இசையமைப்பாளராக சாம், எடிட்டராக சுரேஷ் ஆகியோர் பணிபுரிந்து வருகிறார்கள். திரைப்படம், தொலைக்காட்சி மற்றும் இணையதள மீடியாக்களில் கால் பாதிக்கும் பாஃப்டா மீடியா ஒர்க்ஸ் இந்தியா என்ற புதிய மீடியா நிறுவனத்திற்காக கிரியேட்டிவ் என்டர்டெய்னர்ஸ் & டிஸ்ட்ரிபியூட்டர்ஸ் இத்திரைப்படத்தை தயாரித்து வருகிறது.