டிசம்பரில் வெளியாகிறது தங்கர் பச்சானின் களவாடிய பொழுதுகள்

தங்கர்பச்சானின் இயக்கத்தில் உருவாகியுள்ள 'களவாடிய பொழுதுகள்' திரைப்படம் டிசம்பரில் வெளியாகும் என படக்குழு அறிவித்துள்ளது.

பிரபுதேவா, பூமிகா, பிரகாஷ் ராஜ் உள்ளிட்ட பலர் நடிப்பில் உருவான படம் 'களவாடிய பொழுதுகள்'. இப்படத்தின் அனைத்து பணிகளும் முடிவடைந்தாலும், பல்வேறு பிரச்சினைகளால் வெளியாகாமல் இருந்தது.

தற்போது அனைத்து பிரச்சினைகளும் முடிக்கப்பட்டு, படம் டிசம்பரில் வெளியாகும் என்று தயாரிப்பு நிறுவனமான ஐங்கரன் நிறுவனம் தெரிவித்திருக்கிறது. கதை, திரைக்கதை, வசனம், ஒளிப்பதிவு, இயக்கத்திற்கு பொறுப்பேற்றுள்ளார் தங்கர்பச்சான்.

சிறப்புத் தோற்றத்தில் சத்யராஜ், கருப்பு ராஜா, சத்தியன் ஆகியோரும் நடித்திருக்கிறார்கள். ஒரு பாடலை அறிவுமதியும், மற்ற நான்கு பாடல்களை வைரமுத்துவும் எழுதியிருக்கிறார்கள். பரத்வாஜ் இசையமைத்திருக்கிறார்.

”காதலிக்க போகிறவர்களுக்கு ஓர் எச்சரிக்கை. காதலித்துக் கொண்டிருப்பவர்களுக்கு ஒரு பாடம். காதலித்து முடித்தவர்களுக்கு மீண்டும் ஒரு கடந்தகால நினைவூட்டலாக இப்படத்தை படைத்திருக்கிறேன்” என்று தெரிவித்திருக்கிறார் தங்கர்பச்சான்.