மீண்டும் இணையும் சூர்யா - கே.வி.ஆனந்த் கூட்டணி?

கே.வி.ஆனந்த் இயக்கவுள்ள புதிய படத்தில் சூர்யா நடிக்கவுள்ளதாக தகவல்கள் வெளியாகியுள்ளன.

கே.வி.ஆனந்த் - சூர்யா கூட்டணியில் உருவான படம் 'அயன்' மற்றும் 'மாற்றான்'. இக்கூட்டணி திரையுலகில் பெரும் வரவேற்பைப் பெற்ற கூட்டணி என்று பெயர் பெற்றதாகும்.

மேலும், 'கவண்' படத்தைத் தொடர்ந்து கே.வி.ஆனந்த் தனது அடுத்த படத்துக்கான கதையை எழுதி வந்தார். அதற்கான திரைக்கதையை முடிக்கும் வேலையில் முனைப்புடன் இறங்கியுள்ளார். எழுத்தாளர் பட்டுக்கோட்டை பிரபாகரும் இவரும் இணைந்து திரைக்கதை எழுதும் வேலையில் ஈடுபட்டுள்ளனர்.

படத்தின் முதல்கட்ட வேலைகள் வரும் ஆண்டு தொடக்கத்தில் இருக்கலாம் என்று தெரிகிறது. இக்கதையில் சூர்யாவை நடிக்க வைக்க பேச்சுவார்த்தை நடைபெற்று வருகிறது. இக்கூட்டணி 3-வது முறையாக இணைவது உறுதியாகியுள்ளது.

2018-ம் ஆண்டு ஜூன் மாதத்திற்கு பிறகு இப்படத்தின் படப்பிடிப்பு தொடங்க முடிவு செய்திருக்கிறார்கள். இதன் தயாரிப்பாளர் யார் என்பது விரைவில் தெரிய வரும். இதனிடையே செல்வராகவன் இயக்கத்தில் உருவாகும் படத்தில் ஜனவரியிலிருந்து கவனம் செலுத்தவுள்ளார் சூர்யா.