லீக்கான சாமி 2 படப்பிடிப்பு தளத்தின் படங்கள்: கசிந்த கதைக்களம்; அதிர்ச்சியில் படக்குழு

விக்ரம் நடித்து வரும் 'சாமி 2' படத்தின் படப்பிடிப்பு தள புகைப்படங்கள் இணையத்தில் வெளியானதன் மூலம், கதைக்களம் தெரியவந்துள்ளது.

ஹரி இயக்கத்தில் விக்ரம், கீர்த்தி சுரேஷ், பாபி சிம்ஹா, சூரி உள்ளிட்ட பலர் நடிப்பில் உருவாகி வரும் படம் 'சாமி 2'. இதன் படப்பிடிப்பு சென்னை, டெல்லி உள்ளிட்ட பகுதிகளில் முடிவுற்று, தற்போது காரைக்குடியில் படப்பிடிப்பு நடைபெற்று வருகிறது.

இந்நிலையில், படப்பிடிப்பு தளத்தில் விக்ரம் இருப்பது மற்றும் அதனை சுற்றியுள்ள போஸ்டர்கள், சிலைகள் உள்ளிட்ட புகைப்படங்கள் இணையத்தில் வெளியாகியுள்ளது. இதில் முதல் பாகத்தில் கோட்டா சீனிவாச ராவின் சிலை இருப்பது போலவும், அதற்கு கீழ் விக்ரம் நின்று கொண்டு இருப்பது போலவும் இருக்கிறது.

மேலும், பெருமாள் பிச்சை மகன்களாக பாபி சிம்ஹா, ஜான் விஜய் மற்றும் சுந்தர் ஆகியோர் நடித்திருக்கிறார்கள். இதுவும் அங்குள்ள பேனரில் இடம்பெற்றுள்ள புகைப்படம் உறுதிப்படுத்தியுள்ளது. அதில் 29-வது ஆண்டு நினைவுதினம் எனக் குறிப்பிட்டு இருக்கிறார்கள்.

ஆகவே பெருமாள் பிச்சை இறந்தவுடன் அவரது மகன்கள் விக்ரமை பழிவாங்குவது போல கதைகளத்தை அமைத்திருக்கிறார் ஹரி. 29 ஆண்டுகள் கழித்து நடைபெறும் கதை என்பதால், அப்பா - மகன் என இரட்டை வேடத்தில் விக்ரம் நடித்து வருவதாகவும் தகவல்கள் வெளியாகி இருக்கின்றன.

'சாமி 2' படப்பிடிப்பு தளத்தின் புகைப்படங்கள் வெளியானதால், படக்குழு மிகுந்த அதிர்ச்சியில் இருக்கிறது.