புகழேந்தி எனும் நான் அப்டேட்: அருள்நிதி நாயகியாக பிந்துமாதவி ஒப்பந்தம்

கரு.பழனியப்பன் இயக்கத்தில் உருவாகும் 'புகழேந்தி எனும் நான்' படத்தில் அருள்நிதிக்கு நாயகியாக பிந்துமாதவி ஒப்பந்தம் செய்யப்பட்டுள்ளார்.

சமீபகால அரசியல் நிகழ்வுகளை முன்வைத்து பலரும் தொலைக்காட்சி கலந்துரையாடலில் விவாதித்து வருகிறார்கள். இதில் கரு.பழனியப்பனின் பேச்சு இளைஞர்கள் மத்தியில் பெரும் வரவேற்பைப் பெற்று வருகிறது.

தற்போது மீண்டும் இயக்குநர் பொறுப்புக்கு திரும்பியுள்ளார் கரு.பழனியப்பன். அருள்நிதி நாயகனாக நடிக்கவுள்ள படத்துக்கு 'புகழேந்தி எனும் நான்' என தலைப்பிட்டு இருக்கிறது படக்குழு. இதன் நாயகியாக பிந்துமாதவியை ஒப்பந்தம் செய்திருக்கிறார்கள். 'பிக் பாஸ்' நிகழ்ச்சியின் மூலம் மக்களிடையே வரவேற்பு பெற்றிருப்பவர் பிந்துமாதவி. அதற்குப் பிறகு அவர் ஒப்பந்தமான முதல் படமாக 'புகழேந்தி எனும் நான்' அமைந்திருக்கிறது.

'புகழேந்தி எனும் நான்' படத்தின் நாயகியாக நடிக்கவிருப்பது குறித்து பிந்துமாதவி கூறியிருப்பதாவது:

எனக்குப் பல பட வாய்ப்புகள் வந்தாலும், சிறந்த கதைகளையே தேர்ந்தெடுப்பதில் கவனமாக இருக்கிறேன். நல்ல கதை மட்டுமல்லாமல், நடிக்க வாய்ப்புள்ள நல்ல கதாபாத்திரமாகவும் இருக்க வேண்டும் என்று விரும்புகிறேன். அப்படி சமீபத்தில் எனக்கு அமைந்த படம் தான் 'புகழேந்தி எனும் நான்'.

இது அரசியல் சார்ந்த படம் என்றாலும் என் கதாபாத்திரத்திமும் முக்கியத்துவம் வாய்ந்தது. எப்போதும் நாயகிகளுக்கு முக்கியத்துவம் கொடுத்து கதை எழுதும் கரு பழனியப்பன் படத்தில் நடிப்பது மிகவும் மகிழ்ச்சி அளிக்கிறது. அருள்நிதியுடன் இணைந்து நடிப்பது மகிழ்ச்சி. டிசம்பரில் தொடங்கும் இந்த ’புகழேந்தி எனும் நான்’ படத்தின் படப்பிடிப்பில் கலந்து கொள்ள மிகவும் ஆவலாக இருக்கிறேன்.

இவ்வாறு அவர் தெரிவித்திருக்கிறார்.

யுகபாரதி பாடல்கள் எழுத, இமான் இசையமைக்க இருக்கிறார். இதனை ஆக்சிஸ் பிலிம் பேக்டரி நிறுவனம் தயாரிக்கவிருக்கிறது.