காஞ்சனா 3 இசைக்கு லாரன்ஸின் புதிய திட்டம்

'காஞ்சனா 3' படத்தின் பின்னணி இசைக்கு இயக்குநர் லாரன்ஸ், 'டூப்பாடூ' இணையத்தோடு கைகோத்திருக்கிறார்.

ராகவா லாரன்ஸ் இயக்கி, நாயகனாக நடித்து வரும் படம் 'காஞ்சனா 3'. சன் பிக்சர்ஸ் நிறுவனம் தயாரித்து வரும் இப்படத்தில் ஓவியா மற்றும் வேதிகா நாயகிகளாக நடித்து வருகிறார்கள். வெற்றி ஒளிப்பதிவு செய்து வரும் இதன் படப்பிடிப்பு சென்னையில் மும்முரமாக நடைபெற்று வருகிறது.

இப்படத்தின் பாடல்களுக்காக மதன் கார்க்கியின் 'டூப்பாடூ ' இணையத்தோடு கைகோத்திருக்கிறார் இயக்குநர் லாரான்ஸ். 'டூப்பாடூ' இணையத்தில் புதிதாக இசைக் கோப்பு தொடங்கியிருக்கிறார்கள். இதில் தன்னுடைய இசையைச் சேர்க்க யார் வேண்டுமானாலும் அனுப்பி வைக்கலாம்.

இந்த இசைக் கோப்பிலிருந்து, படத்தின் இசை தேவை என்று நினைக்கும் இயக்குநர்கள் அணுகி தங்களுடைய கதைக்களத்திற்கு தேவையான இசையைத் தேர்வு செய்து கொள்ளலாம். இந்த முறையை முதலாவதாக பயன்படுத்தி 'காஞ்சனா 3' படத்திற்கான இசையை தேர்வு செய்திருக்கிறார் லாரன்ஸ். மேலும், தன்னுடைய கதைக்கு ஏற்றவாறு ஒரு பாடலை வரிகளோடும் தேர்வு செய்திருக்கிறார்.

தற்போது 'காஞ்சனா 3' படத்துக்கு பின்னணி இசை அமைக்கப் போவது யார் என்பது மட்டுமே கேள்விக்குறியாகியுள்ளது. மும்முரமாக நடைபெற்று வரும் படப்பிடிப்பை முடித்து, கோடை விடுமுறைக்கு வெளியிட படக்குழு முடிவு செய்திருக்கிறது.