‘விஜய் 68’ படத்தின் தலைப்பு ‘சிஎஸ்கே’? 

சென்னை: வெங்கட் பிரபு இயக்கத்தில் விஜய் நடிக்கும் படத்துக்கு ‘சிஎஸ்கே’ என்று தலைப்பு வைக்கப்பட இருப்பதாக தகவல் வெளியாகியுள்ளது.

லோகேஷ் கனகராஜின் ‘லியோ’ படத்துக்குப் பிறகு விஜய் நடிக்கும் 68-வது படத்தை இயக்குகிறார் வெங்கட் பிரபு. இதனை கடந்த சில தினங்களுக்கு முன்பு படக்குழு அதிகாரபூர்வமாக அறிவித்தது. இப்படத்துக்கு யுவன் ஷங்கர் ராஜா இசையமைக்கிறார். ஏறக்குறைய 20 ஆண்டுகளுக்குப் பிறகு விஜய் - யுவன் கூட்டணி மீண்டும் இப்படத்தில் இணைகிறது.

இந்த நிலையில் இப்படத்துக்கு ‘சிஎஸ்கே’ என்று தலைப்பு வைக்கப்பட இருப்பதாக திரையுலக வட்டாரத்தில் பேசப்படுகிறது. வெங்கட் பிரபு - விஜய் இருவருமே சிஎஸ்கே மற்றும் தோனியின் தீவிர ரசிகர்கள் என்பதால் இந்த தலைப்பை படத்துக்கு வைக்க இருப்பதாக கூறப்படுகிறது. எனினும் இதுகுறித்த அதிகாரபூர்வ தகவல்கள் இன்னும் வெளியாகவில்லை.

’லியோ’ படப்பிடிப்புப் பணிகள் நிறைவடைந்தபிறகு இப்படத்துக்கான பணிகள் தொடங்கும் என்று எதிர்பார்க்கப்படுகிறது.