அர்ஜுன் இயக்கும் ‘சீதா பயணம்’ படத்தின் ஃபர்ஸ்ட் லுக் போஸ்டர் எப்படி? 

சென்னை: நடிகர் அர்ஜுன் தயாரித்து இயக்கும் ‘சீதா பயணம்’ படத்தின் ஃபர்ஸ்ட் லுக் போஸ்டரை படக்குழு வெளியிட்டுள்ளது.

2018-ல் தனது மகள் ஐஸ்வர்யாவை வைத்து ‘சொல்லிவிடவா’ படத்தை இயக்கினார் அர்ஜுன். தற்போது 6 வருடங்களுக்குப் பிறகு மீண்டும் இயக்குநர் நாற்காலிக்கு திரும்பியுள்ளார். அவர் இயக்கும் படத்துக்கு ‘சீதா பயணம்’ என தலைப்பிடப்பட்டுள்ளது. தனது ஸ்ரீராம் பிலிம்ஸ் இன்டர்நேஷனல் நிறுவனம் மூலம் இந்தப் படத்தை அர்ஜுன் தயாரிக்கிறார். நிரஞ்சன் மற்றும் ஐஸ்வர்யா நடிக்கும் இந்தப் படம் தெலுங்கு, தமிழ் மற்றும் கன்னட மொழிகளில் வெளியாகவுள்ளது.

சத்யராஜ் மற்றும் பிரகாஷ் ராஜ் ஆகியோர் முக்கிய கதாபாத்திரங்களில் நடிக்கின்றனர். நடிகை ஐஸ்வர்யா இத்திரைப்படம் மூலம் தெலுங்கு சினிமாவில் அறிமுகமாகிறார். இந்நிலையில் இந்தப் படத்தின் முதல் தோற்றத்தை படக்குழு வெளியிட்டுள்ளது. ஃபர்ஸ்ட் லுக் போஸ்டரில் ஐஸ்வர்யா - நிரஞ்சன் இருவரும் காரில் செல்வது போல வடிவமைக்கப்பட்டுள்ளது. காதல் கதையை அடிப்படையாக கொண்டு இந்தப் படம் உருவாகியுள்ளதாக தெரிகிறது. படத்தின் ரிலீஸ் தேதி அறிவிக்கப்படவில்லை.