ராமாயண கதையை மையமாக வைத்து 3டி-யில் உருவாகியுள்ள பான் இந்தியா படம், ‘ஆதிபுருஷ்’. பிரபாஸ் ராமராகவும் கீர்த்தி சனோன் சீதையாகவும் சைஃப் அலிகான் ராவணனாகவும் நடித்துள்ளனர். ஓம் ராவத் இயக்கியுள்ள இந்தப் படத்தை டி-சீரிஸ் பிலிம்ஸ் சார்பில் பூஷன் குமார் தயாரித்துள்ளார். ஜூன் 16ம் தேதி வெளியாகும் இந்தப் படம், 22வது டிரிபெகா சர்வதேச பட விழாவில் பிரத்யேகமாக திரையிடப்படுகிறது. அமெரிக்காவின் நியூயார்க் நகரில் ஜூன் 7 முதல் 18 வரை இந்தப் படவிழா நடக்கிறது.
இது தொடர்பாக பிரபாஸ் கூறும்போது, ‘இந்தத் திரைப்பட விழாவில் ஆதிபுருஷின் பிரத்யேக காட்சியைக் காண்பதில் பெருமை கொள்கிறேன். டிரிபெகாவில் பார்வையாளர்களின் வரவேற்பைக் காண ஆவலுடன் காத்திருக்கிறேன்' என்றார்.