கடந்த 47 நாட்களாக நாடெங்கும் ஊரடங்கு உத்தரவு அமலில் இருப்பதால் சினிமா படப்பிடிப்புகள் பாதியில் நிறுத்தப்பட்டு, திரையரங்கங்கள் மூடப்பட்டுள்ளன. இதனால் திரைப்படத் தயாரிப்பாளர்கள் பலருக்கு நஷ்டம் ஏற்படும் நிலை ஏற்பட்டுள்ளது. இதனைக் கருத்தில் கொண்டு நடிகர்கள் விஜய் ஆண்டனி, ஹரீஷ் கல்யாண், அருள்தாஸ் உள்ளிட்ட்டோர் இனி வரும் படங்களில் தங்கள் சம்பளத்தை குறைத்துக் கொள்வதாக அறிவித்துள்ளனர்.
இந்நிலையில் நடிகர் மஹத் ராகவேந்திராவும் தனது சம்பளத்தை எவ்வளவு வேண்டுமானாலும் குறைத்துக் கொள்வதாக அறிவித்துள்ளார்.
இதுகுறித்து மஹத் கூறியிருப்பதாவது:
இன்றைக்கு சமூகமும் சினிமாவும் இருக்கும் சூழலில் நடிகர்கள் விஜய் ஆண்டனி, ஹரீஷ் கல்யாண் போன்ற நடிகர்கள் தங்களது சம்பளத்தை குறைத்துக்கொள்ள முன்வந்துள்ளார்கள். ரொம்ப சந்தோஷமாக இருக்கிறது.. நானும் கடந்த பத்து வருடங்களாக இந்த திரையுலகில் இருந்து வருகிறேன்.. சில படங்களில் நடித்துள்ளேன்.. இன்னும் நிறைய படங்கள் பண்ணவேண்டும் என ஆசைப்படுகிறேன்..
இப்போதுதான் இரண்டு படங்களில் ஹீரோவாக நடிக்க வாய்ப்பு கிடைத்துள்ளது. கொரோனா தாக்கம் காரணமாக நிலவி வரும் இந்த ஊரடங்கு சூழலில் சினிமா தொழிலாளர்கள் பலரும் பாதிக்கப்பட்டுள்ளனர். இதில் அதிகமாக பாதிக்கப்பட்டுள்ளது தயாரிப்பாளர்கள் தான். திரைப்பட விநியோகஸ்தர்களும், திரையரங்கு உரிமையாளர்களும் கூட அதிகம் பாதிக்கப்பட்டுள்ளார்கள்.
இந்த மூன்று தரப்பினரும் சேர்ந்து முடிவெடுத்து, எங்களுக்கு இவ்வளதான் தான் கட்டுப்படியாகும், உங்களுக்கு இவ்வளதான் சம்பளம் கொடுக்க முடியும் என அறிக்கை வெளியிட்டார்கள் என்றால் அதற்கு ஒத்துழைக்க நான் தயாராக இருக்கிறேன்.
பத்து சதவீதம், இருபது சதவீதம் குறைத்தாலும் பத்தாது. ஏனெனில் திரையரங்குகளுக்கு மக்கள் வர நாட்களாகும். எப்படி போட்ட பணத்தை எடுக்கப் போகிறார்கள் என்பதே பெருங்கேள்வியாக உள்ளது. இந்த சமயத்தில் சக கலைஞர்கள் பாதி சம்பளத்தையாவது விட்டுக் கொடுக்க முன்வந்தால் நல்லது.
என்னைப் பொருத்தவரையில் அது எத்தனை சதவீதமாக இருந்தாலும் குறைத்துக்கொள்ள நான் தயாராக இருக்கிறேன். என்னைப்போல வளர்ந்துவரும் நிறைய நடிகர்களும் இதற்கு ஒத்துழைப்பார்கள் என நம்புகிறேன்.
இவ்வாறு மஹத் ராகவேந்திரா கூறியுள்ளார்.
மங்காத்தா படத்தில் அறிமுகமான மஹத், ஜில்லா, சென்னை- 28, உள்ளிட்ட படங்களில் நடித்துள்ளார். பிக்பாஸ் இரண்டாவது சீசனில் 16 போட்டியாளர்களில் ஒருவராகவும் கலந்து கொண்டார்.