“அஜித்துடன் இணைகிறார் சிவா; ‘கங்குவா’ பட இரைச்சல் சரி செய்யப்படும்” - ஞானவேல் ராஜா 

சென்னை: “இயக்குநர் சிறுத்தை சிவா அடுத்ததாக அஜித்துடன் இணைகிறார். ‘கங்குவா’ படத்தின் இரைச்சலை சரி செய்ய திரையரங்கைச் சேர்ந்தவர்களிடம் பேசியிருக்கிறேன். வால்யூம் குறைக்கப்படும்” என ‘கங்குவா’ படத்தின் தயாரிப்பாளர் ஞானவேல் ராஜா தெரிவித்துள்ளார்.

இது தொடர்பாக அவர் தெலுங்கு ஊடகத்தினரிடம் கூறுகையில், “அடுத்து இயக்குநர் சிவா அஜித்தை வைத்து புதிய படம் இயக்குகிறார். இந்தப் படத்தின் படப்பிடிப்பு அடுத்த ஆண்டு ஏப்ரல் மாதம் தொடங்கும். அதன் பிறகு ‘கங்குவா’ 2-ம் பாகத்துக்கான பணிகள் தொடங்கும். ‘கங்குவா 2’ மிகப்பெரிய பட்ஜெட்டில் உருவாக உள்ளது” என்றார். மேலும் ‘கங்குவா’வில் இரைச்சல் அதிகமாக இருப்பது குறித்து அவர் பேசுகையில், “சத்தம் அதிகமாக இருப்பதாக விமர்சனங்கள் எழுந்தன.

அனைத்து திரையரங்கு உரிமையாளர்களிடமும் பேசி, 2 பாயின்ட் சத்தத்தை குறைக்குமாறு கூறியுள்ளேன். இது இசையமைப்பாளர் தேவி ஸ்ரீ பிரசாத்தின் தவறல்ல. மாறாக, சவுண்ட் மிக்ஸிங்கில் ஏற்பட்ட சிக்கல். முதல் நாளில் கொஞ்சம் எதிர்மறையான விமர்சனங்கள் வரத்தான் செய்யும். ‘தேவரா’ படத்துக்கு கூட இது நிகழ்ந்தது. அடுத்தடுத்த நாட்களில் இது மாறும் என நம்புகிறேன். வார இறுதியில் வசூல் அதிகரிக்கும். சூர்யாவின் திரையுலகில் அதிக வசூல் ஈட்டிய படமாக இது இருக்கும்” என்றார்.