“அடுத்த 5 ஆண்டுகள் மலையாள சினிமாவுக்கானது!” - ஃபஹத் ஃபாசில் நம்பிக்கை

சென்னை: “அடுத்த 5 ஆண்டுகளுக்கு மலையாளத்தில் நீங்கள் என்னவெல்லாம் செய்து பாக்க முடியுமோ அனைத்தையும் செய்துவிடுங்கள். திரையுலகமும், பார்வையாளர்களும் அதற்கு தயாராக உள்ளனர்” என நடிகர் ஃபஹத் ஃபாசில் நம்பிக்கை தெரிவித்துள்ளார்.

அவர் அளித்த பேட்டி ஒன்றில், “சமீபத்திய மலையாள சினிமா வர்த்தகத்தில் ஆச்சரியமிகு மாற்றம் நிகழ்ந்துள்ளது. தியேட்டர் வசூலில் 40 முதல் 50 சதவீதம் வரை வருவாய் வளர்ச்சி ஏற்பட்டுள்ளது. ‘மஞ்ஞும்மல் பாய்ஸ்’, ‘பிரேமலு’, ‘ஆவேஷம்’, ‘வர்ஷங்களுக்கு சேஷம்’, ‘ஆடு ஜீவிதம்’, ‘பிரமயுகம்’ படங்கள் சிறப்பான வரவேற்பை பெற்றுள்ளன. ஒவ்வொன்றும் வித்தியாசமான படைப்புகளாக இருந்ததால் பார்வையாளர்களும் படத்தை திரையரங்குக்கு வந்து பார்க்க தயாராக இருந்தனர்.

வர்த்தகம் கூடினாலும், ஓடிடி தள விற்பனையில் மலையாள சினிமா இன்னும் அழுத்தமாக கால்பதிக்கவில்லை. திரையரங்குகளில் படத்தின் வரவேற்பை நிரூபித்தால் மட்டுமே ஓடிடிக்கான வாய்ப்புகள் உருவாக்கப்படுகிறது. இந்தியாவின் மற்ற திரையுலகில் படப்பிடிப்பு தொடங்குவதற்கு முன்பே கிட்டதட்ட 80 சதவீத படங்களின் ஓடிடி உரிமை விற்கப்பட்டு விடுகிறது. மலையாளத்தில் அப்படியில்லை.

எங்களை பொறுத்தவரை வித்தியாசமான அதேசமயம் பரவலாக பேசப்படக்கூடிய சினிமாக்களை உருவாக்குகிறோம். வர்த்தகம் மற்ற விஷயங்களெல்லாம் இரண்டாம் பட்சம் தான். நல்ல சினிமாவை உருவாக்க வேண்டும் என்பதுதான் முதல் நோக்கம். கிட்டதட்ட எல்லோரும் அந்த மனநிலைக்கு வந்துவிட்டார்கள் என நினைக்கிறேன்.

படைப்பாளிகளுக்கு என்னுடைய அறிவுரை என்னவென்றால், அடுத்த 5 ஆண்டுகளுக்கு மலையாளத்தில் நீங்கள் என்னவெல்லாம் செய்து பாக்க முடியுமோ அனைத்தையும் செய்துவிடுங்கள். வசனமில்லாத படமோ, இசையில்லாத படமோ அல்லது மீண்டும் ஒரு ப்ளாக் அண்ட் வொயிட் படமோ எந்த வகையான முயற்சியாக இருந்தாலும் செய்து பாருங்கள். எல்லாவற்றையும் முயற்சி செய்து பார்க்க வேண்டிய சரியான நேரம் இதுதான் என்று நினைக்கிறேன்.

எதைப் பற்றியும் அச்சப்படாமல் முயற்சி செய்யுங்கள். பார்வையாளர்களும், திரையுலகமும் அதற்கு தயாராக உள்ளது. களம் தயாராக உள்ளது. நம்முடைய முயற்சிகளை செய்து பார்க்க வேண்டிய சூழல் உருவாகியுள்ளது. ரூ.100 கோடி பாக்ஸ் ஆஃபீஸை நோக்கி ஓடாமல் அர்த்தமுள்ள சினிமாக்களை உருவாக்க வேண்டும்” என்றார் ஃபகத் ஃபாசில்.