சென்னை: அல்லு அர்ஜுன் நடித்துள்ள ‘புஷ்பா தி ரூல்’ படத்தின் டீசர் வரும் 8-ம் தேதி வெளியிடப்படும் என அதிகாரபூர்வமாக அறிவிக்கப்பட்டுள்ளது.
அல்லு அர்ஜுன், ரஷ்மிகா மந்தனா, ஃபஹத் ஃபாசில், சுனில் உள்ளிட்டோர் நடித்து கடந்த 2021-ம் ஆண்டு வெளியான படம், ‘புஷ்பா: தி ரைஸ்’. சுகுமார் இயக்கிய இந்தப் படத்துக்கு தேவி ஸ்ரீ பிரசாத் இசை அமைத்திருந்தார். இந்தப் படம் வெற்றி பெற்றதை அடுத்து, இதன் அடுத்த பாகம் இப்போது உருவாகியுள்ளது. ‘புஷ்பா தி ரூல்’ என பெயரிடப்பட்டுள்ள இப்படத்தின் படப்பிடிப்பு இறுதிகட்டத்தை எட்டியுள்ளது.
முதல் பாகத்தை விட மிகவும் பிரம்மாண்டமாக இந்தப் படத்தை உருவாக்கி வருகின்றனர். ஆக.15-ம் தேதி படம் வெளியாகும் என்று கூறப்படுகிறது. இந்நிலையில், இப்படத்தின் டீசர் வரும் 8-ம் தேதி வெளியாகும் என அறிவிக்கப்பட்டுள்ளது.
முன்னதாக, படம் குறித்து பேசியிருந்த நடிகை ராஷ்மிகா மந்தனா, “என் கேரக்டரான ஸ்ரீவள்ளி, ‘புஷ்பா’வுக்கு மனைவி ஆகிவிட்டதால் இன்னும் சில பொறுப்புகளை ஏற்க வேண்டியிருக்கிறது. இதில் அதிகமான டிராமாவும் மோதல்களும் இருக்கின்றன. ரசிகர்களுக்குப் பிடிக்கும் வகையில் அதிக மசாலா விஷயங்களும் இருக்கின்றன” என்றார்.