வரலாற்று சாதனை | ஏப்ரலில் ஜிஎஸ்டி வசூல் ரூ.1.87 லட்சம் கோடியை எட்டியது

புதுடெல்லி: சரக்கு மற்றும் சேவை வரி எனப்படும் ஜிஎஸ்டி வசூல் கடந்த ஏப்ரல் மாதத்தில் வரலாற்று உச்சமாக 1,87,035 கோடியை எட்டியுள்ளது.

இதில், மத்திய ஜிஎஸ்டி (சிஜிஎஸ்டி) ரூ.38,440 கோடியாகவும், மாநில ஜிஎஸ்டி (எஸ்ஜிஎஸ்டி) ரூ.47,412 கோடியாகவும், ஒருங்கிணைந்த ஜிஎஸ்டி (ஐஜிஎஸ்டி) வசூல் ரூ.89,158 கோடியாகவும் இருந்தன. இதில், இறக்குமதி செய்யப்பட்ட பொருட்கள் மூலமாக கிடைத்த வரி ரூ.34,972 கோடியும், செஸ் மூலமாக பெறப்பட்ட ரூ.12,025 கோடியும் அடங்கும் என நிதியமைச்சகம் நேற்று வெளியிட்ட அறிக்கையில் தெரிவித்துள்ளது.

நாடு முழுவதும் ஜிஎஸ்டி அமல்படுத்தப்பட்ட பிறகு மாதாந்திர அடிப்படையில் அதன் மொத்த வசூலானது ரூ.1.75 லட்சம் கோடியை தாண்டுவது இதுவே முதல்முறை. கடந்த ஆண்டு ஏப்ரலில் வசூலான தொகையைக்காட்டிலும் நடப்பாண்டு ஏப்ரலில் ஜிஎஸ்டி வசூல் 12 சதவீதம் அதிகரித்துள்ளதாக நிதியமைச்சகம் கூறியுள்ளது.

கடந்த மார்ச் மாதத்துடன் முடிவடைந்த 2022-23 நிதியாண்டில் மொத்த ஜிஎஸ்டி வசூலானது ரூ.18.10 லட்சம் கோடியாக இருந்தது. இது, முந்தைய 2021-22-ம் நிதியாண்டில் வசூலான ஜிஎஸ்டியுடன் ஒப்பிடுகையில் 22 சதவீதம் அதிகம் ஆகும்.